In te la bodega, dopo el sepolimento

Nanetto Pipetta - Sergio Angelo Grando – Porto Alegre – RS

Pena fenio sepolir Nani, tuti va catarse tea bodega. Tel semitero resta solo i murari par ciusar la tomba e on cagneto pien de rogna, perso e pien de fame.

Tea bodega, tuti quei che no à podesto saludarse prima, i lo fava adesso, co voce pesarosa e fàcia sèria.

I alsava la testa, solo par impiombar el goto de caciassa. Lìquido ardente, comprà zo drio el Rio das Antas, dea védova del poro Lira.

 Posted by Talian Brasil on 05/06/2011

El primo tiron la brusava anca i sentimenti e la se fermava tei calcagni. Dopo, drioman che la sbrissiava zo, insieme la portava ànimo e ghe dava volume a la voce.

Cossita, tuti più liegri, i à scomissià contar stòrie de ani antichi. Stòrie dei bisnoni e dei noni, passade vanti de na generassion a l’altra.

Gnanca le stòrie del morto no ze stà smentegae. Imprima, però, quando la fiama dela caciassa zera bassa, zera contà solamente le stòrie dele braure de Nani, le carità, le bone òpere.

Drio man che la mìnsia stomacal scaldava, le bosie, pardon, le stòrie criava pel. Diseva uno:
- Te ricòrdito quela del compare Nani col badilon?

L’altro, ridendo, ghe rispondeva:
- Nò, nò, quela del badilon nò. La ze massa grossa.

El primo tornava:
- E quela dea peada del musso?

E quelaltro:
- Nò, gnanca quela del musso. La ze pedo de quela del badilon.

Cossita i à sevità fin che la ombria dele piante zera più longa che la pròpia pianta e el sole no scaldava più tanto.

Sta ora, tanti rideva fàcile, sensa tante stòrie. Altri i briscolava come canelini al vento.

Nanetto, te on canton, sentà te on scagno de legno, bevendo la so gasosa de Guzzo, stava atento a tuto. Però, ncora la voce no gaveva ritornà dal tuto, par via dela comossion che’l gaveva intorno.

El sol ndava pròpio basso, quando i trè re magi, Ciro, Àngelo e Nanetto, compagnai de Fiorindo e altri vecioti dele lìnie Quarta, Tersa e Seconda i se ga instradà verso casa.

Drio man che cadauno rivava casa, invitava i altri a ndar rento on menutin, o par proar el salame vècio e el pan fresco, o sinò par proar el vin dela bote spinada de poco.

In fati, col reloio de corente picà in tea sala smartelava dódese bote de una note de ciaro de luna, Àngelo e Nanetto i à messo i pié rento casa.
- Passa vanti, Nanetto, ghe dise Àngelo. Sta note te dormi qua e doman matina vedemo come la boie.
La meda note à corso calma, sensa tanti movimenti. Na volta o altra la poiana dava na ridada come fusse na sigagna mata.

Co ze stà le sei, i gai gavea belche cantà tute le lode che i savea. Càpita fora Nanetto dea cambra russando i oci. El vede Pino, Àngelo e la nona Pina sentai a tola pronti par far la colassion. La Marcolina brustolava polenta, rostia uvi co formaio tendro e passava el cafè nel saco de bombasina.

On tatin piandeva de fame, infassà tea cuneta fata de strope.
- Bon giorno a tuti, saluda Nanetto, sentàndose zo tacà Àngelo sensa tante serimònie.
- Bon giorno, risponde tuti.

Se podeva veder che i ghe volea ben al Pipetta. Nò tanto par i so cognossimenti, ma più de tuto par la simplicità e bona fede che’l gavea co tuti.

El tira zo do fete de polenta, on paro de spironade de fortaia e la Marcolina ghe à impienio na scudela de cafè col late. La ga ringrassiada co la boca piena par no perder tempo. Fenio la polenta, el taia na fetona de pan, ghe dà na smaltada co do dei de botiro e medo salame, e zo che la vaga.

Co’l zera de pansa piena el dise:
- Bisogna che me tire vanti, sinò la fameia de Àndolo e la Gelina i casca in bruti pensieri se no rivo casa.
- Ò na proposta de farte, vanti che te miti i pié in strada, ghe dise Àngelo. Se Àndolo no à tanto de far e se te voi, ò tanto mìlio de sapar. Me ocoraria aiuto. No posso pagar tanto, ma dà par vansar calcossa.
- Gavì dito sapar el mìlio, sior Àngelo? Mai più gavaré arà la tera e impiantà la semensa par dopo saparlo su?!

Vedendo che’l Pipetta tirava a torno Àngelo, tuti se à messo rider de gusto.
- Te sì on birbante, on bufon, ghe risponde Àngelo, proando tègnerse de rider, ma, co quel matussel là, no ghe zera altra maniera che rider insieme.
- Ben, dise Nanetto, ghe parlo a Àndolo, se’l me libera, luni, tea ora dea colassion, son qua. Intanto, adio e steme in salute.

Sergio Angelo Grando
Email: sergio.grando@terra.com.br