La fàbia del pineto de Nadal

Tel tempo che le bèstie parlava, ze nato, te a borda d’on bosco, vicino a na strada storta, on pineto araucària.

La stòria de la natività del pin ze stà fruto del òpera natural dela perpetuassion dele spèssie.

On giorno, na graia zera drio inpienirse la pansa insima on pinaron de copa, pien de bòsie maùre, del altra banda de la strada.

Quando zera de budele piene, la ga pensà:

 


- E domàn, ghen saralo ncora de sti pignui par coparme la fame?

Par via de no corer gnanca on ris-cio, la ga ciapà on bel pignol, grosso, liso e san, e, te on pìcolo zolo, lo à portà tel bosco vicino, e lo ga sepolio polito, disendo:
- Se doman no ghen cato più tel pinon, vegno magnar questo.

Però, passà el giorno drio e altri giorni, e co la bondansa de par tuto, la se ga desmentegà del pignol per sempre.

Co ga s-copià la primavera, co tanta piova e el benedeto sole, el pignol, tel corso naturale, ga butà fora la cresta dela tera. In puchi mesi dava par veder che’l cresseva con voia e salute, come on cavareto che siùsia trè volte al di. Tel quinto ano, zera belche on scapoloto, slongando i brassi par tute le bande.

Alora, te quel ano, vèspera de Natale, na matina ciara e pura come l’ànima del Banbin Gesù, se ferma te a strada na camignoneta. Ze desmontà on omo de barba bianca e on tosatel de sei o sete ani. I vardava in volta, come sercar calcossa. De repente el toseto ga osà:
- Pupà, pupà, varda qua. Go, infine, catà el pineto par far el nostro presèpio. Ben de la altessa che ocore…

El omo verde la porta dela camignoneta, el tira fora quatro palmi de facon co la làmina lustra come on spècio. El va a taco el pin e el alsa la man par dar el taio mortal. El pineto, vedéndose perso, el ga osà:
- Fèrmete, sito drio pensar cossa?! Te sì mia gnanca mato de darme na faconada.

El omo, el ga ciapà on spaventon tanto grando che’l ga sbassà la man e el ze restà de boca verta. El ga stentà creder te quel che’l ga visto. Par no aver dùbio, el ga tocà on ramo del pin e el ga sentisto on spunsion. El pineto ghe ga dito de novo:
- Gheto visto? Se te proi farme del mal, mi te spónsio.

E el ga continoà:
- Voleo farme del mal parché?

El toseto ga dito che’l volea portarlo a casa par impienirlo de bòsie e làmpade coloride par ornar el presèpio. Alora el pin ghe dise:
- Se te me porti via de qua sensa radise, te me vidi cossita el màssimo tre giorni, dopo, sensa i me nutrienti, devento seco. Tel màssimo te on mese, o te me buti via, o te me fè arder. Se te me assi qua, invesse, te podarè véderme durante tuta la to vita e anca de i to fiui e nipoti. Darò ombria a caminanti, magnar a osei e bestiolete de mato.

El toseto el ga contradito:
- Ma ze la tradission de Nadal taiar on pineto e che’l fassa parte del presèpio!…
- Ma alora – ghe risponde el pin – parché no te me vestissi qua rente el bosco e la strada. Là casa te sarè ti solo co la to fameia. Qua, però, te poi menar tuti i to compagni de scola e insieme fè na bela festa de Nadal.

Dito e fato, la note de Nadal de quel ano la ze stata la meio note de tuta la vita de na mùcia de fameie de quela comunità.

La tradission dela festa de Natal nel bosco la continua fine ncò, almanco te la fàbia nostra. Adesso, i nipoti de quel toseto i mete su bocete e làmpade colorie nei rami dei fiui del primo pin che’l ga depiù de un metro de diàmetro. Cossita resta on esémpio de che chi rispeta i boschi i gavarà sempre ombria par riposar e osei par sentir cantar.

 

Sergio Angelo Grando
Email: sergio.grando@terra.com.br

 

Scrivi commento

Commenti: 0