Nanetto Pipetta – Sergio Angelo Grando – Porto Alegre – RS
Dopo quela saga dei bùlgheri, de Matia Zanetti e de far el mas-ciaro, Nanetto ze ndà trovar la morosa nantra olta. El voleva contarghe tuto, come fusse na resa dei cunti.
In tola, a la sena, la prima sera, Nanatto à fato un relatòrio a la fameia de Àndolo, sensa tirar via gnanca na vìrgola. Pitosto, dontarghe qualche punto de sclamassion, come, Quanta paura! O, sinò, Che braure!
Quei che lo scoltava, invesse, i laorava depiù co le interogassion. I se domandava fra de eli:
- Fato corer i bùlgheri? Montà insima le balse? Se’l poverin ga paura del aqua, co el va tea sécia bever, el ciapa el canecheto o el menestro pìcolo, co paura de negarse!
Àndolo, soratuto, el pensava:
- Laorar co oto giunte de boi?! Se l’è mai stà bon dàrghene fora gnanca co na giunta solo?! Gnanca col Bragado e el Rabioso, do bo mansi fa due cavarete.
Quando Nanetto ga contà che l’à parà porchi in trupa come se para i boini, Titelo se à messo
rider de na maniera che’l magnar ga sbalià la strada e squasi che’l se sofeghe. L’è vegnesto rosso e dopo l’à scomissià a vegner negro par mancansa de fià. Sorte de Nanetto, che’l savea de tante
robe par via che’l avea girà el mondo depiù de tuti, el brinca el toso par dedrio, ghe passa le man in medo la vita, e el ghe ga dà on strucon così grando che la polenta e i radici in gola i ze
vegnisti fora de colpo come fusse stà na schitada de galina co la ga el schiton fulminante. Solo cossita Titelo à scomissià tirar el fià nantra volta.
- Sorte che la mama ze belche ndata in cùcio, pensa la Gelina. Senò no sò cossa podaria vegner fora. La se spaura co na fassilità granda. La passa male e dopo ghe vol on paro de giornade par
tirarse su in punto de laoro.
Nanetto el sevitava:
- Na doménega ga piovesto on despropòsito. Zera San Piero e tuti i àngeli che i trava do aqua a tonei. Mi e Zoan, on negron de do metri e poco de altessa e per lo meno on metro de larghessa,
forte come on toro e valente come on leon, fiol liberto de schiavi, sensa altro de far, semo ndai in tel Rio das Antas, par veder se le balse de tole le zera a posto e se l’aqua zera tel livelo
par molarle zo a Porto Alegre.
Semo tolti su on lamo par omo e na latina de mignoche e zo par la riva tegnéndose te le piante, te le radise e tei sassi, par no ciapar via qualche tómbola fatale.
In puchi menuti se zera coi lami rento tel aqua.
No zera gnanca stirà tuto el spago e on pi bruto de on tiron me à ciapà desprevenio e, se Zoan no me gavesse tegnesto, saria cascà rento tel rio.
Se gavea picà on pesse de quei grossi. Mi tirava in su e el pesse tirava in do! Ma no podeva cavarlo su del aqua de colpo, parché gavea paura che’l spago se rompesse, parché el zera fiacheto.
Alora go pensà:
- Co ocore, molo spago, e co dà, tiro in su. Cossita l’ò stufà. Ò luità più de meda ora, finché el bisson se à stufà. Lo ò strassinà fin tel baranco parché Zoan podesse ndarghe soto coi brassi e
el podesse sgiaventarlo fora del rio. De altra maniera el spago podaria rómperse e nantri perder el pesse.
- Si, e zèrelo grando, domanda Titelo, pien de coriosità, pesàvelo tanto?
- Nò tanto, diz Nanetto sèrio. Mi ò calculà che’l pesava on diese chili e Zoan el me à giurà che’l pesava de più de dódese.
La Gelina coi oci spalancai de dimirassion la ga dito:
- Ma, Santa Àgata, che pesson!
E Àndolo ghe ga dontà:
- Ma te sì vegnesto fora on baloton. Onde se ga visto pesse de dódese chili qua tel Rio das Antas?! Zele bosie da contar?
E Nanetto, co la fàcia più sèria e deslavada del mondo:
- Si sior, Àndolo. A gavé la me garansia che la ze stata pròpio cossita, come i ve la ga contada.
Sergio Angelo Grando
Email: sergio.grando@terra.com.br
Scrivi commento