Nanetto Pipetta – Sergio Angelo Grando – Porto Alegre – RS
Le torade le zera rastae fora del mato par i cariaduri, verti a segon, manara e ronconi. El comprimento zera inversamente proporsionale a la grossessa dela torada; o sia, quanto più grossa la torada, più pìcolo la longhessa, par via del peso. Ma, dele volte, la torada la zera tanto perfeta e de on legno bon, come el pin de copa, che bisognava tégnerla longa al manco sei metri. Alora, par rastarla fora, i doparava le oto giunte de boi.
Nanetto sevitava dir:
Posted by Talian Brasil on 29/06/2011
- Se i me lo contasse, mi no credaria!
Fora del mato, le torade zera messe co la ponta pi grossa insima do rode del careton. Cossita, solo co la ponta più fina strassinando in tera, co manco contato dea bora cola tera, la zera strassinada più fàcile. Per questo, i podeva menar tre anca quatro torade al colpo co due giunte de boi.
Quando, de le volte, la bora zera pròpio granda, invesse de solo due rode, el careton zera trasformà in quatro rode, e i menava na bora al colpo. Quele pròpio grosse le segava in prance intiere, le quale se trasformava in tole par magnar e altri artefati che ocoresse na tola sensa dontaùre.
Cossita, i caretuni i zera doperadi par menar le torade fin al inzegno, i portava rente tre mila chili de peso.
I zera doperai anca par menar prodoti dela colònia al mercà, porchi al frigorìfico, co i zera puchi. Co zera tanti porchi, alora compensava pararli a trupe, come ve la contarò più vanti.
I caretuni, soratuto, i servia par menar via le tole dopo segade. Tante le zera distribuide te la regione taliana. La grande maioransa, però, le zera menade a Porto Alegre, par meso del rio das Antas, in forma de balse, come ve spiego adesso.
Dopo segade, le tole zera muciade in forma de pìlie co busi che passasse el ària calda de istà par secarse. Dopo seche, Nanetto e altri laoranti, le cargava tei caretuni e le menava fin te’l baranco del rio das Antas. Là e zera messe te’l aqua e fato pìlie de più meno vinti tole de altessa. Dopo i ligava tute le pìlie insieme, e se tornava na parte dela balsa. Cossita, dopo, i inganciava tute le balse, una tacà l’altra e i spetava piover e che cressesse el rio. Co’l aqua zera dela altessa conveniente, i molava ste balse te la corentesa, e el aqua le menava zo pal rio, fin a Porto Alegre.
Nanetto no viaiava mia co le balse, par due motivi: el primo, parché ghe piaseva gran tanto laorar coi boi; dopo, parché el gaveva paura del aqua, come i gati ga paura dela piova; e se lo sà belche parché!
Cossita, se ga fato on comèrcio pròpio grando. I balseri menava le tole a Porto Alegre e i portava casa notìssie. te’l ritorno, i vegnea fin a Mussun col tren, e de là, fin a la Fazenda de Matia, i vegnea a pié par trodi in meso el mato.
In meno de vinti ani de colonisassion taliana te la regione, più de setanta par sento del mato ze stà taià e, te’l posto, zera piantaion de formento, mìlio, vignai…
Sergio Angelo Grando
Email: sergio.grando@terra.com.br
Scrivi commento