Le maledete bestiolete che busna in testa de Nanetto

Nanetto Pipetta

Sergio Angelo Grando – Porto Alegre – RS

 

L’ùltima volta che l’ò visto, Nanetto Pipetta el zera zudante de sofero de Gènio, che’l menava prodoti dei coloni a Caxias do Sul, e de Caxias do Sul el menava de ritorno feramente, robe in metro e altre tràpole par vender ai pìcoli mercati dele colònie. Ò savesto che Nanetto ze ndà a altri posti, dopo che’l ga dassà de laorar de zudante de Gènio. El ze ndà a Santa Catarina, a la Quarta Colònia, e l`à fato on viaio più longo, in Itàlia.

Dopo tornà del Itàlia, saveo onde lo ò catà de novo?

 

 Posted by Talian Brasil on 05/06/2011


- In te’l luogo che ghe piaseva meio star in tuto el mondo, la casa de Àndolo, parché cossita el stava a taco dela Gelina.

No’l gaveva comprà né colònie, né on camion come Gènio, però l’era contento istesso.
Lora, dopo tornà a casa de Àndolo, par on tempo pareva che’l se avesse chietà e el impiantasse radise. Però, puchi misi dopo, la voia de viaiar e de scambiar la ze tornada.

Na sera, in cosina, dopo sena, Nanetto e la fameia de Àndolo i senava. In tola, formaio, salame e on panaro de polentina dala. Davanti el piato del Pipetta, grando cofà on mastel, on bussoloto de vin negro, pien fin la metà. Lo ga vardà, lo à ciapà in man, lo à snasà:
- Vin negro, bon, incorpà!

El beve on bel fià, lo mete do, e el continua:
- El podaria anca esser bianco che no’l cataria brasso stanco par alsarse in punto de boca.

La Gelina, passionada, lo vardava. Nanetto, tristo, sospirava come na màntesa sbusa e vècia.

Dà che’l Pipettaparlava poco, la poverina, spesso, ghe domandava:
- Cosa gheto, Pipetina?
- Son drio deventar débolo co tanti pensieri strànii. E sì ò ‘ncora poca età par aver sto velimento. No son pi pròpio contento come da ani indrio, co scramussava fa le cavre, noando rento te’l Rio das Antas, vanti negarme provisoriamente.
- Cosa càtito che ze stà che te à trato a tochi cossita?, ghe parla la Gelina.

E Àndolo ghe donta:
- Par farte perder el petito, bisogna che la cosa sìpia sèria.
- Dopo che son tornà d’Itàlia, pena smontà del rio-plano, scolto cose difarente, on bacan te le rece come fusse diese mila cicale cantando rento te la testa. Soratuto de note, co me desmìssio! Me par de vegner mato!…
- Bisogna che te vai del dotore, lu che’l ga studià su quel tanto là, el te ricetarà calcosa che fulmine quele bestiolete che vìs-cia rento tea testa. Te vedarè che te stè meio, dise la Gelìna.
- No stà dirlo gnanca de scherso. Quei dotori d’ancò i ghen fa cadauna!… No te ghè scoltà te’l ràdio sti di passai? On omo se à macà na gamba par via che la careta ghe ga passà par sora. L’è ndà del dotore e, invesse operarghe la gamba macada, i ghe à segà via quela bona. Nò, nò, de doturi gnanca pensar, e basta.
- Ma varda, go paura che te sì drio deventar mato pròpio. Te quel caso, ben che’l dotore podaria sbaliarse, parché le gambe zera due. Co ti, nò no’l pol sbaliarse. Te ghè na testa solo, ri, ri, ri…
- Te ridi ti che no te sè l’avelimento che sto busnar de bestiolete in testa me fa passar.
Nanetto sgorla la testa, come se quei movimenti repentini parasse via el buio. Dopo, ciapa el goto de vin e te on fià el suga su tuto, come la bìvita fusse l’ùltimo e ùnico remèdio par negar le bestiolete.
- Caro, ghe dis la Gelina, sò anca mi che le comperative de vin le va cada volta meio!

Se fusse stà nantra volta, Nanetto el ghe diria calcossa, ma, come l’è restà muto, la Gelina la mena la testa e la dise:
- No te è mai bevesto de questa maniera che te bivi in tei ùltimi giorni!
- Titelo, pàsseme in su el formaio. Domanda Nanetto.

Titelo slonga la man par darghe el formaio:
- Taia fin, seto, che’l vien fora d’on buso streto.

La Gelina proa de tute le maniere, na ora schersando, nantra brontolando, par veder se Nanetto se dasse coraio e el trasse via quei bruti sentimenti. Ma lu, gnente.

Fenia la sena, la Catina l’à scomissià catar su i piati e la ordena:
- Valtre, tose, lavè do i piati, e ti, Pipetta, brinca la corona.

Meda ora dopo, la fameia gaveva dito su la corona e mastegà su on poche de invocassion ai santi, e riva l’ora de ndar in cùcio.

Nanetto, sensa tante serimònie, el se instrada, disendo solo:
- Note!

 

Sergio Angelo Grando
Email: sergio.grando@terra.com.br

 

Scrivi commento

Commenti: 0