On becon de na bissa e na bruta osada se fa sentir

Nanetto Pipetta

Sergio Angelo Grando – Porto Alegre – RS

El formento, dopo sesolà, zera metesto in tera, sempre insima la paia par ciapar al manco on di o due de sol. Cossita, el restava con poca umedità e co’l zera ligà a faie e metesto al querto, no zera perìcolo de far la mufa.

Ma, dele volte, el tempo cambiava de colpo e, al segnal dela prima tronada… Misericòrdia! Zera na baderna… Se zera de note, alora, cosa de deventar mati.

Ze stà pròpio cossita che ga sucedesto quela note de luna piena.

Zera torno meda note e tuti dormiva on sono giusto, dopo de on giorno cola schena sbassada taiando formento.

La nona Pina, che gaveva el sono liviano, la ga scoltà tronar. In sùvito la ga pensà che fusse stà el nono Angelin che molava le àrie co strèpito. L’è stata atenta, e nantra tronada, adesso ben forte e s-ceta. Distante ancora, là par la banda de Monte Véneto. Ghe à dà on sgorlon al nono:
– Ciò, vècio, scolta che ze drio tronar.

El nono, pien de sono, el se volta de quelaltra banda, e el resmunga:
– No te è altro da far?! Onde se ga visto tronar… Dormi, ndemo, che daquà on paro de ore ze ora de levar su.

Co l’à fenio la prèdica, na tronada più forte lo ga messo in senton.
– Ostamenta! ze pròpio vero.

Sensa dir altro, el salta su del leto, e el scomìssia a ciamar:
– Tusi, Nanetto, su che ghe ze qua la piova e la ne bagna tuto el formento.

On menuto dopo, i zera tuti in cosina, scoltando le órdine del nono. No se ga scapà gnanca quei che imparava cosir co Pino. Ze stato casa solo la nona Pina par tender i putei, e Pino che’l zera on omo de poca salute. El Nene, co sete ani, età del giudìssio, ze stà incaricà del feral a petròlio. El nono ordenava:
– Intanto femo faie, le metemo a mùcio e le querdemo co la lona. Co vien fora el sol, lo spaiemo nantra volta e cossita el se seca.

La sorte che zera on ciaro de luna tanto bel che catar le branche de formento no zera difìcile. Ma bisognava far presto, parché le nùvole negre piene de s-ciantisi se vicinava in presto. On vento de piova à scomissià sufiar.

Cossita, co la man drita i catava su el fasseto, meteva tel brasso sanco, fin che ghin stava. Quel che portava le strope o le corde de mato, meteva zo una, due o trè che catava su, meteva i fassi insima la corda. Nantro, de brasso bon, ligava la faia e portava a mùcio.

El Nene, col feral, stava tel mùcio. Una, parché i laoranti ghe vedesse polito come postarlo; nantra, parché quei più distante savesse onde zera el posto de meter le faie.

Banda San Biàsio, na strissa de nùvole se fava gigante. Le tronade aumentava e i s-ciantisi meteva paura. Nel resto zera silénsio.

Te quela chietùdine, tuto de un colpo, se à sentio na più bruta de na osada. Par la voce, tuti savea che zera stà Nanetto sberegar.
– Aiuto, Santantoni, go ciapà on becon de na bissa. Ai, ai, ai…, che mal, che doluri, oi, oi, oi…

Quando ze ndà catar su na branca de formento, insieme el ga ciapà qualcossa che se ga movesto e lo ga sponcià. Lu, spaurà, el ga molà suito la brancada de paia e el ga pensà che fusse stà na bissa.

Par sorte, in puchi menuti i à ligà su la ùltima faia e querto el mùcio de formento. Par sora e dele bande on puchi de sassi parché el vento no alsasse a lona e tuti co pressa i ze ndati casa.

Co i ze rivadi, s-ciarava el dì. La polenta drio brustolarse insima la siapa à verto el petito de tuti. Insima la tola, na fortaia che la pareva on panaro pien de polenta. El cafè zera drio colarse. El Nene à smorsà el feral. Zera matina. El nono à ciapà el brasso de Nanetto e ghe dise:
– Vien qua che ghe demo na vardada tel becon dea bissa.

Lo à vardà, zaminà co la lente de la pràtica de on giusta-ossi.

Do menuti dopo el taca rider e el mostra a Nanetto cosa ze stà che lo gavea becà:
– Varda qua, Nanetto, cosa ze stà che te ga becà, mostràndoghe on spineto de branchìlio.
– Si, ma lora zèrelo cosa che ga saltà fora dela branca de formento?
– Qualche sordo che magnava i grani, o qualche fioleto de lepra che se ga sconto soto el baruscareto de spinaro par scapar dei can de mato. Me l’à belche tocà anca mi….

Sergio Angelo Grando
Email: sergio.grando@terra.com.br