Sio bon tegner in strada sta bruta bèstia?

Nanetto Pipetta

Sergio Angelo Grando – Porto Alegre – RS

 

- Génio, Génio, son mi, Nanetto Pipetta, de desso in vanti el vostro aiutante de viaio par tuta la Mèrica.- Ma varda chi ghe ze qua! Nanetto! óstrega, te zeri mia morto?

- Squasi! Na volta co’l Bragado rabioso voleva impiantarme i corni; nantra, quando son negà provisoriamente tel Rio das Antas e nantra, a puchi giorni, quando na pi bruta congestion squasi la me trà a tochi. Ma zelo vera che gavì vendesto quela camignoneta vècia, rangiada a fil de ferro e spago de salame, e gavé comprà on camignon grando, e anca mené prodoti a Caxias, e anca mené roba fata de Caxias par le colònie dei migranti?

- Craméscola, se vede che no te ghè scambià gnente, te sì la medèsima bétega de tempi indrio. Vien qua che te mostro el camignon.

Co’l toso el ga visto quela màchina relusente, granda fa na casa de do andari, co na mùcia de penei che l’era fin fadiga contarli tuti, l’è restà de boca spalancada e sensa parola.

- Alora, cossa càtito, Nanetto, ghe domanda Génio, dàndoghe on spenton par desbambirlo.

- Cato che qua dà par cargar pi de sento cariolade de mestieri, e ncora ghe vansa posto. Diseme na roba, Génio, sio bon po tegner in strada na bruta bèstia de queste qua? Ve ocórelo mia qualchedun par giutarve tégnerlo in strada, o sinò serarghe le rode riva in zo. No credo mia che vu solo sì bon de far tuto. L’è mia come la camignoneta che la zera sete, oto volte più pìcola… Santìssimi, che mestieron!

 

Sergio Angelo Grando
Email: sergio.grando@terra.com.br

 

Scrivi commento

Commenti: 0