Nanetto Pipetta – Sergio Angelo Grando – Porto Alegre – RS
La ponte del Rio das Antas, na òpera de arte e, soratuto, on proieto che, se nel primo momento, ela assava qualche dùbio, adesso la se mostrava secura e de tanta utilità. Zera el progresso rivando e coronando el lavoro dei primi taliani.
Adio barche, adio tempo de sofrimenti, de rio alto, de perìcoli de morte eterna o provisòria, pensava Nanetto, co’l ga visto quela bela òpera de inzegnaria.
El varda Génio pien de comossion e, co le làgreme tei oci, el ghe dise:
- Sior Génio, pensava mi qua, che se ghe fusse stà la ponte par passar el rio, no saria mia negà e gnanca passà par quei momenti terìbili dea me vita.
-Valà, valà, consolava Génio. Te ghè bio sorte ti che te ghè podesto salvarte e aver podesto rissussitar. Pénsate quei che, come ti, i se ga negà e no i ga bio la seconda oportunità?!
- A ghe rason si. De le volte anca se piande de pansa piena. Intanto i ze rivadi te la ponte. Nanetto l´era na mistura de contento e preocupassion. El dise:
-Génio, fermé el camignon che mi vago vanti a pié par veder se la ze segura, se no la brìscola e no ghe ze perìcoli. Savì mia, se, col camignon, co tre mila chili insima l’è drio passar, a metà del solaro se rompe? Che tómbola santìssima? Varde che altessa! E po, vanti fidarse passar, l’è meio che disemo su el ato de contrission e se racomandemo l’ànima. Se de le volte…
-Tasi su, ghe brava Génio, no te vidi che te sì drio assarme nervoso anca mi?
Metroametro, el camignon ndava vanti e la ponte stava indrio. Co i ze soto i archi, Génio, a posta, sensa che Nanetto se nicordasse, el ga desligà la ciave e el camignon el se ga fermà.
-Santantoni, giuteme. Cosa zeo stato Génio? Ve lo go dito che sta volta ndemo in malora. No vui mia cascar de quela altessa e gnanca morir nantra volta, par carità fè calcossa, Génio.
Sergio Angelo Grando
Email: sergio.grando@terra.com.br
Scrivi commento