Nanetto Pipetta
Sergio Angelo Grando – Porto Alegre – RS
Ze vegnesto l’ora de snetar le bote, parché, stano, l’ua francesa se gaveva adiantà. La staion ze stata bona. Bei giorni de sol, piova abastansa, tuto à giutà. Par Nadal ghe saria vin dolse.
Prima de tuto, el mastel par boier le sarpe. Nanetto à saltà rento pié par tera. In prima, cola scoa e aqua, ghe à dà la prima sfregada.
Dopo, trucà l’aqua e co’n brus-cion, el à gratà una par una tute le doghe. Par ùltima, aqua boiente co rami de persegaro par desinfetar e saver da bon. Quando el à catà che zera neto, lo à impienio squasi fin insima col aqua freda, parché le doghe cressesse e le se inciusasse.
Dopo ze rivà l’ora de snetar la bote par meter el vin co’l vegnea fora dele sarpe par scomissiar staionarse.
L’avea sol due busi. Uno insima pal cocon de impienimento e, davanti, par meter la spina. Per questo, par sapetar par rento e parafinarla, ghe voleva cavar el fondo. Bisognava cavar el primo e el secondo sércio e pianpianelo cavar el fondo.
El nono tegneva la cugneta de fero poiada tel sércio e Nanetto col martel smacava. El primo sércio ze vegnesto fora che ze stà na maraveia. Co i zera drio tirar a torno el secondo, na smartelada più fissa, la bote ze ndata a ramengo.
El nono ze vegnesto rosso come on gàmbaro rostio. El pareva che’l molasse fiame pal naso. L’à respirà fondo e se à sentà te na sécia che a zera là in torno col cul voltà in su. Tuti spetava quela bruta splosion de ràbia, che dele volte el nono Àngelo saveva far co maestria. Nò che’l fesse pròpio de tuta ràbia. L’era più par mostrar che’l zera lu che comandava; che zera qualchedun tea fameia degno de meter órdine tel punaro. E chi comanda, osa quando el vol e come el vol.
A torno, tuti atenti e chieti, co on òcio tei lauri e nantro sora el nono. Podaria, se la ràbia fusse tanta, anca zolar qualche sassada o smatonada. Chi podaria saver?
Passà on puchi de menuti, el tira fora dea scarsela la tabaca e el à snasà la presa. El leva su, el varda le doghe a mùcio, el varda
Nanetto e, ridendo, el dise:
– Stano travasemo el vin rento tei stivai.
Nanetto, che’l gavea imparà l’ofìssio de far bote, el ga snetà tute le doghe e col aiuto de la zia Marieta e Celeste Marinelo, l’à remontà el vasiliame, parafinà e sarà.
La matina drio, suito dopo el primo cantar dei gai, se à fermà el vento che gaveva sufià tuta la note. S-ciarava, in spesso come fusse
on ferer smartelando el ancùdene. Dopo na tronada cataclìsmica, se à invià la piova. Nanetto l’à pensà:
– Levo su e impio el fogo. Intanto che’l aqua boie vago via drio el luamaro e cato on baldeto de mignoche e vago pescar. Col aqua tùrbia riva tel rio, ciapo na cariolada de pissi.
Co’l ze tornà in cosina, ghe zera on boligamento de gente, che pareva na babel. Come Nanetto, altri gaveva pensà la medèsima roba.
Uno zera ndà catar bachete tel sbaro de taquare, nantro pestava piombo cavà via de baterie vece de auto, par far piombiti. Se no zera el piombeto, la corentesa menava via el lamo, o sinò el ghe metea più tempo de ndar in fondo, e le sardelete le magnava via la mignoca in secondi.
Se ga stradà in sìncoe, contando Nanetto e el Nene, dopo la colassion.
El nono e la zia Marieta ze ndai tela paiola taiar scartossi par far paie de sigri. La nona Pina drio i bambini. Co la sobrava on menuto la fava on poca de dressa par far capei e sporte. La Marcolina se à messo drio el magnar e quel di, Pino à laorà solo tela alfaiataria.
Uno con un capoto, nantro co na ombrela vècia, l’altro co on toco le lona in schena, cadauno se à coerto come à podesto e in quìndese menuti i pescaduri i zera tel Rio Sapato, quando i primi filiti de aqua tùrbia i se mesturava al aqua neta del rio.
Sergio Angelo Grando
Email: sergio.grando@terra.com.br
Scrivi commento