El caval zera domà

In colônia, Nanetto gà liga el caval soto on massanaro cargo de pumi. Co on tre metri de soga, el podeva catar su la vena che zera in torno la pianta. La note vanti zera stà on paro de culpi de vento e tanti pumi zera cascadi in terra. El caval li ga snasai in prima e dopo el ghe ga dato on sganon a uno. Ghe gà piasesto. El ghenà magna na spansada. Nanetto ga laorà on toco a passar peste e dopo el ghe ga portà on fasseto de canete, abiuni e latui. El caval no a tastà gnente. El gaveva la pansa piena de pumi.

Nanetto lo gà ligà curto e l’a scomissià caressarlo. Cada caressa, el voltava la testa e Nanetto ghe dava on paro de grani de milio. Co ghe ga paresto, Nanetto l á cavà la camisa e ghe la gà metesta in schena co tuta la calma. Come el caval no se gà movesto, l’a repetio la manobra.

-Bem, par desso intanto basta cossita, dize Nanetto.

De mesodi, tel ndar casa, invesso menarlo, Nanetto se a messo caminando in banda. El ga caminà cossita on toco e dopo lá metesto na man te la schena. El caval ga sevità caminar come gnente avesse sucesso.

Co le Rivà casa, el ghe ga dato aqua fresca e ligà in te a naransara vanti el cortivo. Ze ndà in cantina e vegnesto fora co la badana e el pansal. Quando ghe gà messo su la badana, el caval la ga cetada polito. Ma quando ghe gà dato na strendesta co’l pansal, el ga alsa le rece. Nanetto alora ghe ga da na sbrancheta de milio. El caval se ga quieta denovo. Cossita, pianpianel, ga struca el pansal suficiente par che la badana no cascasse.

Nanetto ga disnà, riposà e dopo, se ga instrada nantra volta in colônia, menando el caval, sempre co la badana e el pansal de meda strendesta.

In colônia, co la soga longa, el ga cata da magnar fresco a volonta. Cada tocato, Nanetto ghe ndava darente, lo caresava, ghe dava na brancheta de milio e strendeva nantra scianta el pansal.

Ze rivà será e Nanetto la ga risciada. El ga Mena el caval darente on sassoto e el ga proa montarlo, ma, el caval el se ga tira de banda el gaveva ncora paura.

Alora, Nanetto ga pensà che zera meio spetar nantri paro de giorni.

Tel quinto di, quando Nanetto ga incostà el caval rente on sasso par ndar bem montar, el caval no se ga movesto e el toso ga podesto ndar casa montà.

Co le rivà casa montà, el Nene lo ga visto prima e el ga ciama tuti par veder Nanetto a caval. Ze stà on momento de alegria par tuti. El caval zera domà e sensa darghe via gnanca na scuriada.