Riva nantra volta la festa de Santantoni in te la seconda. Come de costume la socetà in tiera tirava na setimana par pareciar tuto quel che ocorea:
Snetar la busa del sorasco, catar legna de angico, cargar i mortari, snetar in torno la cesa, darghe na man de calcina te le tombe del semitero, rangiar su nascianta la strada, catar i spiti de legno e cosita in vanti.
Te i ultimi di, le cosiniere copava e temperava Le galine; fava agnolini. I omi spacava legna e i copava la bestia pa’l sorasco.
Nanetto zé stà incaricà de divesi lauri:
Cargar i mortari. I mortari, par la giuventù che no sà cosa zera, ve lo spiego adesso:
Zera artefati de aço, come fuse on caneco de due litri de volume, verti in sima e co’n buseto de na banda darente tera. Tel buseto i ghe meteva on stopin. Rento tel “canecon” i ghe meteva polver negra bem strucada e par sora na man de tera seca bem pestada.
Co rivava l’ora de sbararli i ghe petava fogo al stopin, come se fà adesso co i foghetuni.
I molava via de quei sciochi de insordir anca le piante a torno.
Nanetto ghe piaseva far quel laoro de cargarli, parche dopo zera lu che ghe petava fogo e l’ora El se divertia da vero.
Nantro laoro zera segar co la falde in torno el salon e la cesa. Ghe zera sempre tanti picuni e erbe dure que fenia, co poche segade, el fil de la falde. Alora, tocava senarse zo e baterla te la pianta de fero.
Intanto che’l asava la falde in ponto de taio, ghe vegnesto in mente na storia che’l nono Angelin ghe ga conta na volta:
El vesco vegneva cresemar la giuventu de tute le linie in torno a Santantoni. Tanti i zera scavessoti de sedese, dicecete ani.
Alora, la socetà inviava na grande festa par ricever el vesco. I catava palme de palmiro par far l’arco davanti la cesa, tuto ornà de fiuri de mato, onde el vesco pasava soto. Zera na maniera de far on omagio a la importansa del’autorità eclesiástica.
Come zera drio far lu adesso, i segava la grama in torno la cesa e le erbe dure le cavaca, parche taiade restava on picolo socheto e i gaveva paùra che’l vesco, tel pestar el podaria ciapar via qualche rabalton. Alora, el Nono Angelin ghe gà racomandà a Gidio Bassani:
-Invesse taiar le erbe dure, cavele parche le soche no intriga caminar.
Luiz Santoro che tuto scoltava el ghe dize al nono Angelin, par scherso e par torlo in giro:
-Invesse taiarle, parche no ghe lighemo le ponte e femo le balse. Alora vedemo se’l vesco le próprio intrante come i parla.
Ga bastà quele parore par Santoro sentir na bela predica del nono Angelin sora el rispeto che se gà de aver co le autirità.
Ma in fine, co zera será vanti de la festa, Nanetto el gaveva carga i mortari e anca sega le erbe dure. El zera tanto stufo, ma cosi stesso, el ga ringrassià Santantoni parche el vesco no vegnea a la festa, sino cavar su le erbe dure satã stà tanto pedo de segarle.
Scrivi commento