Le ave africane le produziva el dopio de le ave dale. cossita gá scomissiá vansar tanto miel. Alora la Marcolina ghe dize a Nanetto:
-Varda che le ave ga scomissiá samar. Se no te tiri fora el miel, le te lo magna vanti alsar zolo.
La matina drio, Nanetto se instrada verso el fondo de a colonia. Su la careta, tuto quelo che volea par cavar sto miel: mascara, machina de far fumo, strassi veci, in suma, tuto quel que ocoreva. La zia Marieta lo a compagnà, prima, par no assar el toso solo, te on lavoro de grande perìcolo come zé tambarar drio le ave; dopo, parche la zera pràtica, visto che la gaveva giutà tante volte cavar miel insieme al nono Angelin.
Come zera i primi de aprile, el tempo trucava tanto via pa’l giorno. A la matina zera frescheto. Del mesodi in vanti, fin la par le quatro, fava caldo e le ave se fava cative. Cossita, co ghe zera manco de na hora de sol, i zera belche drio despicar i favi pieni de miele.
La careta zera restada on dozento metri distante par via che le ave no marturedasse i boi.
Drio man che Nanetto cavava el miel, la zia Marieta co due banduni, portava el prodoto in te la careta e lo sjaventava rento te on tonel de dosento litri.
Quela funsion a durà fine a le undeze, quando la zia ghe dize a Nanetto.
-El tonel zé romai pien. Le meio che te cavi solo i favi meio, più pieni, seno no ghemo posto che basta. Bisogna anca pensar de assar rento te i cassuni calcossa de miel par le ave gapia da magnar anca ele, tel tempo de carestia.
Rente mesodi i zera belche stradai verso casa, co na bona ricolta.
Co la Marcolina ga visto tuto quel miel la dize:
-Marieta, te me porti qua on poco de qual miel que mi son drio impastar i biscoti e oncoi li indolso co’l miel. Cossita, par um paro de giorni gavemo dulci de pasta de la meio qualitá in te la colassion.
Insuma, quela setimana, ghe zé stà fato tanti altri magnari co’l miel. La nona Pina ga messo via te on viero diverse erbe medicinale com caciasa de lambico e co on paro de scuciarade gaiarde de miel.
El Nene se la ga cavada a suciar el miel de i favi. solo che, poreto, sensa saverlo, co’l gaveva la pansa piena e ghe ga batesto la sem, el ga bevesto na scudela de aqua freda.
Em puchi menuti el zera drio gomitar come on porcel.
La nona Pina alora la ga scomissià brontolar:
-Ve lo go sempre dito que dopo magnar miel no se cade bever aqua freda par sora.
El Nene, poverin, el se gaveva desmentegà de quela recomandassion e par via de quel tanto, el zera drio pagar i so pecati a gòmiti.
Scrivi commento