I peccati del Nene

Zera on sabo dopo mesodi e ghe zera messa tel capitel de Santantoni de a linia seconda. El Frate Maurício dizeva su la messa e Ciro Grando ghe fava da secondo. Zera ncora el tempo che’l frate dizeva la messa in latin e sempre volta co la facia par el altar.

Ciro l’era belche on omo fato e maridà. Come’l gaveva studià dei frati, el gaveva na pratica granda co le funsion e el ledeva latin sceto.

El Nene se gà senta darente Nanetto. El scoltafa tuto chieto. Quando, però el frate ga scomissià dar la comunion, Nanetto se ga messo in pie par ndar comungar. El vede che el Nene no se move. El ghe domanda soto você:

-Te vê mia tor la comunion?

-No che no vao, ghe risponde el toseto. Ieri go fato on pecato mortal e no son gnancora ndato confessarme.

 

Alora, Nanetto sensa dir altro, el zé ndà e el Nene zé resta senta tel so posnto, quieto come on bao, oservà par tuta la fameia.

Tel fine de la messa, te la ora de le recomandassion, el Frate a notifica a tuti che luni drio el passava par benedir le case e anca catar su la questua par la festa de a madona de Lurdes.

Dopo El gà pronunsià:

-Ite missa est.

-Siro solo a risposto:

Deo Gratias.

Pena fato ora de ndar fora de la ceseta, la Marcolina ghe domanda:

-Fiol, come cossita de no ndar tor la comunion?

-No son ndà parche go pecati e prima me toca confesarme.

-Alora, luni co’l Frate vien benedir le case, bisogna che te te confessi e par penitensa, dopo de le orassion che’l Frate te racomanda, bisogna che te ghe dè de presente uma de le sinque galine che te te ghe slevà par comprarte le bicanque de dugar futibol. Cossita te impari a no ofender a Dio.

Vedendo que’l so patrimònio ndava in malora, co le lagreme tei oci, più de rabia do che del’altro, el ghe risponde:

-Mi no go mia ofendesto a Dio. Go ofendesto a la nona Pina.

-Cossa ghe gheto dito che te la ghe ofendesta?

-Gnente no ghe go dito. Ghe go solo tirà la lengua e ele me gà dito che tirarghe la lengua a i piu veci zé pecà mortal e se no me confesso vao al inferno.

Nanetto che tuto scoltava se ga mola a rider come on mato. La Marcolina gà proa tegnerse ma no la gà podesto e anca ela se à messo rider. Te’l fin ghe gà dà na mucia de basi al Nene comossa co tanta inosensia. Par fenir la ghe dise:

-No ocore gnanca che te te confessi col Frate. Quel pecato là te lo perdono mi, basta che te domandi scusa a to nona.

Quel di là e anca el di drio, Nanetto lo gà tolto in giro e el ghe dizeva:

-Varda Nene, far polito senò te sè che to nona te manda scoar bronse tel inferno insieme co’l barabec.

Scrivi commento

Commenti: 0