Nanetto se insônia.

Dopo doma i due cavai e el mul el ghe dize a la Marcolina:

-Oncoi vago cassar. La zo in colônia onde ghemo batesto el riso, ghe zé on samo de columbi de campo. Ghen ciapo on paro e, sta será, femo la oselada.

El se tol su la sciopeta trenta sei de Boito, na scarselada de cartuci cargi fin la boca e el se ga messo sconto rento te on baruscaro, a on diese metri de la paia de riso.

No ga intardigà tanto che on paro de colombete se atrato par magnar. Ghe ga dato fin spissa al deo, de la voia de dar via na sciopetada, ma el gà pensà che suito vegneva anca i columbi de campo, coei più grossi che on galeto garnizè.

No a demorà tanto e in medo le pombarole se ga trato zo due columbi che i pareva due polastri. El ga spetà che i se vicinasse e el ga smirà e bum...i osei se ga levà, meno i due columbi e na pombarola. I zera morti, fulminai de la sciopetada de Nanetto.

Li ga tulti su e el se a sconto nantra volta. Cossita te meda ora el gaveva mucia suo n diese columbi e on quindese rondinele.

-Par ncoi intanto basta. No cade destrudir. Co coesti, intanto sta sera ghemo na sena de quele de lusso.

Ancora in colonia el ghe gà cavà le pene e co’l zé riva casa se stà facile fenir de snetarli.

La zia Marieta gà providensià i radici pissacan temperai col’l lardo e la mama Marcolina la ga fato la polentona de quele de impegnar tuto’l panaro. El vin zé stà par conta del zio Toni.

Cossita, Nanetto a messo tel piato na camadina de polenta, uma de tocio, nantra de formaio grata de quel che becava in boca, de bom che’l zera e, dopo, el se ga messo drio. E vai na piatansa, dopo nantra e suito la tersa. Par sora tuto, vin sensa mesura.

La Marcolina ghe dizeva:

-Nanetto, varda che te magni massa onto e te stè mal. Magna anca radici che coei te giuta a far la digestion. Nanetto ghe risponde:

-Ostrega, ma radici ghe’n magno tuti i giorni. Columbi nó e, el dize ncora contento:

-La merica zé na grande cucagna. Se beve e se magna e liegri se stà. E el rideva de contento.

Insuma, la parle dise, tuti se a messo a leto. Nanetto l’a stentà sarar ócio, ma quando l’a dormio el se gà insônia.

El zera inbarcà te on bastimento verso l’Itália par veder i sui. Veder se i zera ncora vivi: El nono, la nona, el pupà, la mama, in fine, tuta la fameia, quando ga scomissia sufiar el vento. El mar se gà inbestià in puchi menuti e la nave scramussva come on caval mato. Piu che ventava, piu alte zera le onde. Col su e do dela nave, el gà scomissià far sforsi. El gà scomissià pregar:

-Ho bom Dio, go paura de che sta volta ndemo a bale alte e i tubaruni i fa la festa co la me carne. Giuteme par carità. Son ncora doveno e no go gnanca assa la me semensa te sto mondo, par via che no o bio tempo e gnanca soldi par maridarme.

Nantra onda piu granda de tute, ga trato el bastimento tanto alto che pareva che’l gavesse le ale e el fusse drio zolar. El mal star zera insuportabile e el gà scomissià a gomitar come on porcel e ozar par misericórdia de Dio. In quela el se desmissia co i sgorluni de la zia Marieta. la ghe dize:

-Lo saveva che la vegneva fora cossita. Te ghe magnà massa onto. Salta su del leto e vá lavarte. Intanto mi truco le querte.

Co’l toso zé rivà in cosina el ga catà la Marcolina co na cicra de sià de fioriti de vendre santo.

-To Nanetto, bivi quel sià quà, che’l te iuta cavarte fora de sta penúria che te si messo

Scrivi commento

Commenti: 0