EL SCHELETRO

 

Come ogni massajadore che se rispeta, anca Ivano sol so studio-anbueatòrio el ga, picài su i muri, tanti carteùni col corpo umano speà e sbregà in tute ‘e maniere. E dopo ‘l ga anca on schèetro, beo grando, rigorosamente de plastica. Da coalche mese el ga assunto come aiutante na dotoressa rumena, bea fiòea, che, pa rìdare, ‘a ghe ga messo in testa a Juri (el schèetro) na peruca ceéste-ciaro che ‘a’o fa, se possìbie, ncora pì orendo: pare che’l gàpia sol zhucato na mufa cu i fii lunghi.

 

A mi el me ga fato rìdare de gusto l’ultima volta che so ndato là farme el taliando de’a schina, ma no ga ridesto par gnente Bepi M., madegoto romai senzha speranzha, se mai la ga bia, e trato al càncaro, che vedéa Juri pa’a prima volta parché pa’a prima volta el ghéa ciapà el coràjo de spéndare schei da Ivano pa  farse métare a rejìme el so ossario descunìo da i doeùri.

 

Pena rivà drento, dopo ver ilustrà i so dani, el ga fato l’òcio baeotòn vardando Juri, e’l ghe ga dito a Ivano:

 

-Ciò, porco can! (se fa par dire, parché coà nessuni dise “porco can!”), no sarìa mia mejo che te scuindissi na s-cianta chea morte là? ‘A me varda mae. No ze che ‘a me parèce de’e brute maedission, fin che so coà?

 

 

Ivano, ridendo soto i bafi, ché’l ghea capìo ‘l bèrgamo e’l ghea voja de torlo pa’l sésto, el ghe ga podà on traverson bianco su i ossi de’e spàe de Juri che desso, so l’ntravédare tochi de ossi, el paréa ncora pi terìbie:

 

-Vàeo ben cussì? Ndemo, ndemo! Sta chieto! Coesto ‘l ze on schèetro bon fa’l pan. El jera de Toni Zanèa, el mejo omo de’a tera! Desso però despòjate, bùtate coà co ‘a panzha par basso che te lavoro!

 

Senza pi parlare, Bepi el ga ubidìo ma, fin che ’l trafegava pa pareciarse, el ghea na facia che fazéa capire come che ghe ndesse torno i rochei drento ‘a testa pa rapetarse co’a so logica:

 

-Toni Zanèa da…Varda che mi, da pìcoeo, ‘o conossìa. Ma coéo ‘l jera senzha  dinti!

 

-Difati no l’è lu, ma naltro. A ghin’è in volta on mùcio de Toni Zanèa!

 

-Ma ti come gheto fato verlo?

 

-Me’o go fato dare dal bechin. Co’l tira su da’a busa i schèetri, quìi mejo conservai e co tuti i so tochi justi, el ghi i  vende a chi ch’ii ghe ocore pa studiare, pa fare ‘e messe nere, pa aredare ‘a taverna e tante altre robe insoma! Basta pagare e te cati coéo che te vui! A proposito: ti che te si senzha dinti e senzha dentiera, no ti ghin vurissi mia una de seconda man, coasi nova?

 

-Can dal porco…! Lazzaron ti e anca lu! Desso go capìo ndove che’l ga catà i schei pa conprarse ‘a Mercede nova, sto fegura porca!

 

-Ma parcossa t’intavànito tanto, proprio ti che te ghe cavarissi ’a pèe ai peoci se’a vaesse schei? Te par justo trar via ‘a roba che poe servire?

 

-Bruto sassin de on porcon! A sarà mejo che ghe fazha vèrdare i lòcui di i me veci pa saère se i ghe ze ncora drento. Che no me càpite de conprarghe i fiuri e de pagarghe ’a corente de‘e lumiere a du bussoeòti udi!

 

 

 

 

Lora Ivano ga tacà sentire ‘a spussa da brusìn che capita co’ madegoto fa rima co baucoto: co sti ciari de luna de privacy, de ULS e de tute chealtre mas-ciade che a’a jente lazarona no ghe par vère pa inpiantar casin pa far cariera.

 

Jera mejo par lu de darghe on tajo co ste ciàcoe e de dirghe a Bepi che’l ghe ghea contà on poche de busìe tanto pa rìdare.                                                       

 

 Ma Bepi el ghéa senpre visto i schei come l’unica cucagna de’a vita e tuto coéo che garìa podesto farghe far schei a lu e a chealtri, in coalsiasi modo, el jera vangèo da no métare gnanca in discussion:

 

-Zherca, zherca de scòndare ti desso! E magari si anca soci sol traficon ché te ghe cati i massajaduri che conpra!

 

-Ma sito mato! Varda che ze fora lèje tegnere schèetri veri. E po ‘l mio el ze de plastica. Vàrdeo puito!

 

-Che ‘o varde puito anca! Parché l’è poco bruto, can dal porco! Comunque sta tranquìo! Mi no go visto gnente parché so jente che no parla!

 

Difati dopo du dì ‘o saéa tuto ‘l paese.

 

Scrivi commento

Commenti: 0