Bepi Furlan jera drio bàtare 'a falzha soto 'l peraro grando de'a piantà de crinto, ndove che ora de segare se metéa na piàntoea fissa, e da’e marteàe che 'l ghe voltava via, paréa che la ghesse su co 'l so fero, anca se 1'ocio jera seguro e a ogni colpo ‘l fio vegnea vanti tirà come on rasuro. Ma chea matina eà 'l jera propio inveenà parchè cussì no se podéa ndar vanti. Ghe jera che da Samartin, co’ jera morto so pare, 'è robe ndava senpre pedo e lu le ghea senpre in-na-mente: da santa Lùzhia ghea disperso 'a cavàea. E si che jera da’ e sèmene che no 'a ndava pi tacà! Soto 'e feste adìo Olga, una de’e mejo vache. Jera racoanti dì che 'a magnava poco, ma chea matina che la ga vista co'l péo drito, corbàtoeo e rece frede, el se’a ga sentìa suito che rivava naltra bastonà. -On fero!- ga dito ‘l veterinario e za ‘l jera on dejtodover desbrigare via, e pa’ na scarseà de nose, na bestia cussì, braa da late e piena, se no ghe fusse sta de pedo: che se perdia on cristian in boaria. E po basta bastian! Dopo 'l pìcoeo de ‘Angeo se ghea scaezhà on brazho dugando in teda e, pa farla conpìa, jera scoasi or mese che Mario ndava via co’l baston pa na peà de on vedèo, cussita stamatina a madego i se ghea catà in du e medo parchè so fiòeo Toni a sèdase ani 'l jera ncora cruato pa’a falzha.
Da coando che jera morto so pare 'a paréa na maedission continua. -E si- el seitava dirse:-che no ze mai sta trascurà gnente!- No ze mia che nu ‘i saesse pì cossa e come fare senzha de 'ù parchè jera da tosati, cu’i se ghea rassegnà al dòo, che i so "Cussì va ben! e "Brai!" faséa da garanzhia. Ma a lu, fursi parchè 'l se ghea invià pa'primo co'so pare, ghe mancava chii diti chesegnava 'a vita fà paracari, chel védarseo senpre davanti su'i mestjri come uno de chii profeti de 'a Bibia che '1 ledìa a fiò coalche volta. Da on dì a chealtro, a coaranta ani, el se ghea sentìo vecio tanto coanto prima 'l se sentia senpre dòvane, anca co fémena, tusi e na goera so'e spae.E, come che gnancora no bastasse, desso anca 'e spose se ghea messo sùssurare co 1'omo, e senpre prima de ciapar sono, come 'a sua, parchè gnanca par lore, ste vache, no ghe jerapi gnente che ghe ndesse ben. Difati li vedea, lu, Angeo e Mario, a’a matina in stàea co du musi che no jera i sòiti, El ghea on bel dire so pare che in fameja, parchè 'e robe vaga puito, bisogna èssare in armonia come i dii de na man, ma coanto pùitoresìstare se coéa chedormeco ti, sèita supiarte so’e rece tute ‘e sere che to fradei no ze to pare.
Cussita stamatina, ncora inbestià, el jera saltà basso che i osei no cantava gnancora, el ghea ciamà chealtri, i ghea inpienà i coari a palpo e i jera rivai so 'a pezha granda chese ghe vedea apena pa no tajarse i garètui. I ghea segà par ore senzha coasi parlare e lu ghe ghéa dato drio con una fretta che
senzha coasi parlare e lu 'l ghe ghéa dato drio co na anda che no jera parché ‘l segasse so l' anton de testa. L'urtava 'a falzha, pi che farla scòrare, spetando pa' uguarla fin propio co 'a se tirava drio l'erba e, co'l ghe dava de pria, pi che cantare, paréa che ’a se lagnasse. Cussì prima de marenda el se ghea catàcol l fero da bàtare, coandoche par sòito el ghe bastava pa’on canpo.
Co‘l ga ciapà, in man ‘l falcaro pa'inpendoeàrghe 'a falzha, el ga sentio pi forte 'l fastidio de'e arte moje, soràe dosso, i brazhiudi che paréache i se destacasse e na fiaca senpre pi granda. –Sarà 'a fame!- e, passàandose ‘e man so'l muso, el se vardava 'l laòro fato e 'e rundinèe che passava zhigoeando a bai. –‘E canta lore, seben che ‘e trìboea pa ‘a fameja!- El vardava, imagà ste frece sfrisare i antuni da indo-che perle de agoazho 'e sbarlucava al soe co tuti i so coeùri. E pi in'à, inte 'l forajo in pie, zhento razhe de zhimoéte, pa farse védare, 'e dindoeava drio l’ aria: scuchi bianchi, sbiavi e viòea de strafoji mistai dal vento, spigaroti lustri de ojezha, bae de véo de pissacan, scanoci russi de pan-e-vin e caspiti rosa de betònega: -li nominava tuti come da bocia- E drío 'l taràjo: rubine de mùssoea, bianche de graspi sgiunfi, ròvari ricamài de rosso e ulmi drio gonfàrse sora, sanbugari che ofre càici. Su'i panpani de’a piantà graspiti drio spanire in medo àé verde de farfàea. E tuto torno compagno so forminti, spagnaari e strafojài. Cantar de osei dapartuto: -Na cìnciara ciama so’a zhimoeta de on ùpio, on merlo coà in zhima 'l peraro, 'l ga zà visto i piri sanpierùi che sgoarada …Guardate gli uccelli liberi nell'aria … i fiori dei canpi- el se ga inicortode dire forte vegnendoin si, ncora co’na man so’l muso: -Se lo ga dito Lu, Lu sa coéo che pa' noaltri ze 'l bon o 'l tristo e a noaltri no ne resta altro che ciapare coèo che gnen!-
El se ga sentio 'a boca arsa e na sen che 'l garìa béesto anca 1'àcoa del coaro. Chealtri du jera coasi al cao de'à. Luri no ghea bisogno de bàtare' a falzha.
Lora 'l ga trato 'l sòito fis-cio a arco verso casa che jera ora de marenda.
_____________________________________________________________________
Scrivi commento