ONBRE PURGANTI

 

 

 

Ani fa Piero e Sergio, du pìcui industriài che voéa ingrandirse ciapando ‘e ocasion che se ghe podéa presentare, insieme co altri de ‘a so categoria e che ghea ‘e so speranse, i ga ciapà contati co’l Ministero di i esteri che ghe ga organisà on viàjo de afari in Libia. Naturalmente i ze stai informai, tra ‘e tante robe, che là no se cata né vin e né alcòici, uficialmente, e  Piero, tanto apassionà de onbre, suìto el ze ndà on poco in depression, ma dopo el ga pensà che pa’i afari se podéa anca sacrificarse pa’ coalche dì.

 

In aereo i ga magnà fa boi, come che in Libia no ghin fusse stà, e beésto de pì, visto che da dove che scumizhiava ‘e àcoe teritoriài de sto paese a sarìa stata àcoa, tè e suchi de fruta.

 

Rivài Trìpui, i ze stai presentai a’e varie autorità, ghe ga tocà ndar magnare anca co’l Presidente on cus cus che nu’i jera buni de parar basso, ma fazéa tuto parte de’e tratative, conpresi l’àcoa e ‘l tè.

 

Piero, intossicà de àcoa e de ste bibite, dopo du dì el ga tacà dare i nùmari. El ghe dizéa a Sergio. –Porco can! (beh, no proprio!) Vui vin! Mi stasera ciapo l’aereo, vao Roma, fào el pien de vin e doman-matina torno indrìo.- Ma sito mato!- ghe rispondéa Sergio –Vuto sassinare i nostri afari?- Ma chealtro no ghe’a moeava pì de invocare San Giovese.

 

 

Intanto i jera drio caminare so ‘e stradèe torno l’albergo e de colpo Sergio sente Piero zhigare: -Varda là!

 

Co’l se ga girà de fianco, no lo ga pì visto rente. Piero el jera za su pa’a vetrina de na botegheta de alimentari, che’l ghe mostrava na pila de bussoeòti de lata che, in medo scrite in arabo e in no-so cossa, i ghea stanpà on graspo de ua.

 

-Gheto visto se nu’i vende vin!

 

-Ma se ze scrito che no se capisse gnente! Chissà che porcarìa che’a ze!

 

-No m’intaressa gnente! El graspo fa fede!

 

Là ‘l se ga trato drento sta botega e dopo poco Sergio lo ga visto vegner fora co do latine inpiràe so’e scarsèe de’a jacheta e una in man, che la ghea pena verta. Dopo ‘a prima sboconà, longa, el ga tacà:

 

-Varda che l’è vin! On poco denso, ma vin! Vuto sajàrghine?

 

-Gnanca morto!

 

-Mèjo, cussì me’o beo tuto mi! Ma varda che l’è vin! On poco massa passito magari, ma vuto che no m’intenda!

 

Trato via el primo bussoeòto, udo, el ga verto ‘l secondo, ma no l’è sta bon de finirlo tuto e’l ghe’o ga passà a Sergio che lo ga roversà: a vegnéa fora pa’l buso na roba viòea, densa come ‘a conserva.

 

-Desso si che stao ben! Ghe voéa tanto poco!

 

Però dopo on poco el ga tacà massajarse ‘a pansa che anca Sergio ghe sentìa brontoeàre. De colpo, bianco fa’l muro e tuto suà, el ga tacà:

 

-Sergio, porco can, ndemo in albergo che me cago dosso! No! No fémo pi ora!

 

-Si che fémo ora! Dai, mòate! Camina!

 

-No posso! O strendo ‘e ciape o camino! Tuto insieme no so bon!

 

E là, sgrentando i dinti e mudoeàndo porcassi che ghe cavava ’l fià, el se vardava in volta pa catare on posto che fesse al caso suo; ma sta stradéa no ghea cantuni morti.

 

                                       

 

 

Anca Sergio ‘l se vardava in volta e ‘l se ga acorto che sta stradèa finìa co du spìgui de case, distanti on metro tra de luri, e co, de’à, on spiasso vodo anca de persone. El ghe ‘o ga mostrà a Piero che no ghe ga parso vero: sacramentando e caminando invergoeà come na stropa, l’è rivà coasi a l’inboco, de colpo ‘l se ga girà: tri passi de retromarcia pa rispetare ‘a geometria de l’incrocio, zo ‘e braghe e te ghe visto on geto da spandi-leàme.

 

Sergio che lo vardava tra conpassion e voja de darghe do bastonàe, co terore el se ga acorto che dadrìo de Piero, so sto spiasso ga tacà passare on mùcio de jente che ga tacà rìdare fa mati, a’e larghe, davanti a sto cùeo vulcanico e anonimo, dato che i vedéa sòeo che coéo.

 

Ma Piero romai el jera ridoto na strazha, dopo no’l stazéa gnanca pi in pie:   el jera podà al muro co’e braghe in man, bianco fa on morto. Sergio ‘l se ga spaentà, l’è corso fora da’a strettoia, saltando ‘a concimazhion, e lora, imatunìo, ‘l se ga acorto che sto spiasso no’l jera altro che’a strada principàe de’a zhità. On boulevard insoma, pien de jente! Meda Trìpui passejava là.

 

Però no’l ga bio tenpo gnanca de vergognarse pa chealtro parché suìto ’l ga visto na guardia, el ghe ze corso incontro e’l ghe ga spiegà, pensando però che sto coà no capisse gnente: invezhe el puizhioto ga capìo tuto suito e co’a radio el ga ciamà l’anbueànsa.

 

A l’ospedàe i ga bio anca ’a fortuna de catare on dotore che parlava benissimo el talian. Co’l ga domandà ‘e informazhion del caso, visto che Piero jera rinbanbìo, Sergio co do paròe el ghe ga mostrà l’ultima latina ncora da snisare. El dotore ga leto l’eticheta e po’l ghe fa:

 

-Questo è concentrato di vino. Quanto ne ha bevuto?

 

-Coasi do latine

 

-Come?!- meténdose ‘e man su i cavìji

 

–Lo sa lei quanto vino si ottiene con un barattolo di questi?...Cinquanta litri!

 

Scrivi commento

Commenti: 0