ARMONIA, TRANQUILITÁ E PACE

 

Cossa gala da fare na persona par catàre l’ARMONIA, LA TRANQUILITÀ E LA PACE durante la so vita su sta tera ?

 

Go provà a rispondarme tante volte in maniere difarente; vardando la zente ca me stava darente, quei ca conossèa e anca quei ca no conossèa; i siòri, i poariti. quei ca gavèa studià . quei ca gavèa fato poca scola, quei ca gàvèa fato sucesso in tante maniere, quei ca ga fato tanti schei anca in maniere difarente e mai gò podèsto rispondare de sicuro se i gavesse catà ,

 

l’ARMONIA,  la TRANQUILITÀ e la PACE.

 

Solo dopo i me otanta ani, go conossesto un omo che el iera contento del so stato, de la so posiziòn e de la so vita; e  no’l gavèa gnente!

 

Par podèrve spiegàre questo go de ‘ndare in drio par vardàre la vita de do fameie de difarente provenienza. La fameia Sacòn e la fameia Guglielmo’s.

 

 

 

 

Carlo  e Rita Sacòn i gà dovèsto lassàre Gorizia durante i primi ani zinquanta, parchè i comunisti Ugoslavi gavèa invaso el  paese e tanti gà dovèsto scapàre par no essare copai o portai a le ( foibe )  Dopo ver passà tri, quatro misi, profughi in Italia, i gavèa deciso de ‘ndàre in Australia dove che i credèa de catàre la felicità conpleta. Solo dopo, con duro laoro e tanti sacrifizi i gà scumizià a catàrse ben.

 

El Siòr Carlo el iera un Farmacista industriale e la Siora Rita la gavèa fato el Liceo Sientifico. Par questo i gà podèsto catàrse lauri abastanza boni, con paghe de sora  del normale. Dopo un paro de ani xe nato un fiolo mascio, i lo gà ciamà Brono come so nono patèrno. Du ani dopo xe nata na toseta, i la gà ciamà Rina, come so nona matèrna.

 

Dopo diese ani de Australia i gà formà na Compagnia e tuti quatro de luri iera soci. I gà tolto in afito na baraca e i gà scumizià a fare pitura par piturare i muri de le case. Par i primi zinque ani la vita iera dura sí, ma la vegnèa ripagà con un guadagno forte. Al sesto ano de afari, la Siora Rita gà dovesto lassàre el laoro parchè xe nato naltro masceto i lo gà ciamà Herbert.

 

El nome  Herbert xe stà la causa de le prime discordie. Parchè la Siora Rita la volèa darghe el nome de so popà inveze el Sior Carlo nol gà volèsto.

 

Dopo tante barufe, discordie, insulti e.......infedeltà, i gà deciso de dividarse e fare el divorzio.

 

La Siora Rita gà volèsto la so parte e anca quela de so fiolo Bruno e de so fiola Rina. In tuto la gà ciapà: $ 200.000,00 (dosento mila dolari ) ch’el iera triquarti del valore de tuto quelo che i gavèa e a chei tenpi i iera tanti schei. Na vera fortuna !

 

El Siòr Carlo gà continuà el so laoro e el xe riussío a rifarse bèn.

 

I tri fioi xe restai con so mama e par i prossimi 30 ani no i ga mai visità  so popà, eceto el fiolo più zovane, Herbert, Col xe deventà più grande ’ndàva a catàre so popà tre, quatro volte ogni ano. El ghe portàva senpre  qualche picolo regàlo. So popà, Carlo el volèa darghe qualcossa anca lù ma Herbert nol gà mai volesto gnente. El disèa: “ Popà mi son contento e felice anca sa no gò gnente.

 

 

 

La famèia Guglielmo’s, invezze, iera na fameia de origine inglese, tuti nati in Australia.

 

El Siòr Jery. el iera un Diretore de Banca e so moiere Brenda la iera na inpiegada de ufizio. 

 

In 7 ani de matrimonio i gà vudo tri fioi do femene e un mascio. I li gà fati studiare tuti tri: una xe deventà maestra. una Segretaria de un avocato e el mascio xe deventà un Professure de musica.

 

Par ani la fameia Guglielmo’s gà vivèsto veramente ben e i iera veramente felizi. Mi me domando:

 

Gavevali catà, de sicuro (L’ARMONIA, LA TRANQUILITÀ E LA PACE ?) Aparentemente no!

 

Dopo che i fioi gavèa finío de studiare, la fameia Guglilmo’s la dovaría essare stà la fameia più contenta del mondo, invezze.....?  Cossa iera sucesso? De preciso mi no lo gò mai savèsto. Solo sò che el Siòr Jery, un poco a la volta, el gà scumizià a bevare, tanto che in pochi anni el iera deventà un dipendente del’alcol. No credo che i gabia fato tante barufe, so che i se gà messi d’acordo de dividarse e continuare ogni uno par conto suo. I fioi xe restà con so mama, senpre  mantegnendo l’amiczia con so popà,

 

Scrivi commento

Commenti: 0