ciao roberto, ti invio foto di mio papà con la...
Matteo Giocattolaio Bareggi 15 marzo 18.10.35
ciao roberto, ti invio foto di mio papà con la mamma

MERCATINO DE'LE ROBE VECIE.

 

Ogni tersa domenega del mese

come se fusimo a Porta Portese

Citade'a se impiena de bancheti

che vende robe vecie e antichi oggeti.

 

Ben s'intona 'sta fiera de cose desmentegae

co' la mura del nostro borgo medievae;

se respira un poco stantia

che sà de muffa e da sagrestia.

 

Ogni portego, de antichità se rivestìo

de çento anni par de esser tornai indrìo;

ai vecioti ghe se sveja le rimembranse

de'a vita de 'na volta, le antiche usanse.

 

Par i zovani xe un gra insegnamento

de savere come, un tempo, gera l'andamento

e fasendo el confronto co' queo che gavemo adesso

capire come i nostri veci, vivesse ben lo stesso.

 

Girando tra i bancheti, se fa un saco de scoperte:

ghe xe la fogarache, piena de bronse, se metea soto le coverte;

che xe el pìtaro che servìa la note per far pìssin

e che se metea via , con cura, dentro al comodin.

 

Varda qua!!! La medàia del Duce, che ancora brilla,

la servìa a tegnere el fasoeto de'a divisa Balilla.

La vissin: le palanche, i ventini, le vecie carte da çento

e le colombine da çinque franchi, le gera parfin d'argento.

 

Fa bea mostra, el gramofono a tromba, coi dischi de Corelli;

le prime radio a volvoe de'a rinomata ditta Marelli;

la fisarmonica co' diese tasti, che vegnea ciamà organeto;

el trombon, el basso-tuba, tuti lustri de oton ben neto.

 

Ghe xe un banco proprio speciae, tuto pien de merleti,

el mete in mostra centri, centrini, tovaie e coprileti,

camìse da note, sotovesti e mutande ricamae

co' l'orlo a giorno e le inisiai ben intreciae.

 

A proposito de biancheria, ghe xe un deto che se tramanda:

"in dote, bisogna portare, almanco tre pari de mudanda

una, se a porta indosso, una , se lava in fosso

e una , par quando che se se caga adosso".

 

Par trovare antiche storie, o romansi, o stampe rare

sul banco dei libri veci bisogna scartabeare;

par vedare del scrivano l'ocorente-qua fa al caso nostro-

ghe xe: registri, penne, pennini, caramai e inchiostro.

 

Beo da vedare xe dove i espone: santi, santini e imaginete,

Madone, San Giusepe, Sant'Antonio e tante altre statuete;

che se metea tacà sul leto, i ga ancora, le acquasantiere,

prina de dormire, col segno de'a Crose se disea le preghiere.

 

Davanti i balochi de 'na volta, la fermata xe obligata:

ghe xe el cava'o a dondolo de cartapesta, el trenin de lata,

el bamboloto de ciroloide, el sacheto de ba'ete,

el teatrin de legno co'le relative marionete.

 

Che merita fermarse a vardar co' atension,

xe el banco de'e ceramiche, in gran esposision:

le grasiose damine de porcean, i piati decorai,

i porse'eti, col buso su'a schena, come salvadanai.

 

De mobili invese, ghe nè bastansa, par i apassionai;

alcuni tirai a lucido, altri ancora carolai,

poltrone imbotie a novo, altre col cussin sfondà

chissà quanta zente, in tanti anni, se gavea sentà.

 

Così ogni tersa domenega del mese, co' 'sta be'a manifestasion,

Citade'a, ghe da a tanta zente dò bone ocasion:

una- ricercando 'sta atmosfera, el tempo antico, possa ricordare

la seconda- par qualcun che gà bon naso, far un lauto affare.

 

Ottobre '96                                Chico (Federico Bareggi)

 

LA FIERA DE CITADE'A

 

 

Ogni anno, al quarto Luni de Otobre, a Citade'a

ghe xe la fiera, del'alto padovano la più be'a;

ormai xe centenari de ani ch la vien fata

del sò preciso inisio, se gà perso parfin la data.

 

Con un antico Decreto Podestarile, FIERA FRANCA la xe deventà

da Dassio e Stassio tute le merci gera esentà:

..."no pagherà gabe'a alcuna le granaglie, le mercansìe,

l'animai da stala e da porcìe ei volatili da cortìe."....

 

In Otobre la vien fata, parchè in campagna i lavori xe finii,

i racolti fati, la u'a vendemà, e l'erba sui fieni'i;

così anca el vilan che gà vansà qualche soldino,

el poe torse 'na licensa a furia de maroni e torbolino.

 

Nei tempi andai la Fiera del Bestiame gera assai importante

de bestie da vendare ghe ne vegnea proprio tante,

tuti i mediatori Tombolani in massa la frequentava

fra pache e stratoni, co' 'na streta de man l'afare i combinava.

 

 

Sui banchi, ai bordi de'le strade, se trovava de tuto:

l'imbonitore, che par ciamare zente, sigava sull'imbuto

par vendare caifugo e graso de marmota

che fasea ben par i dolori e par chi gavea la gota.

 

El vecio Balestra, vendea l'Amaro Digestivo Corroborante

che desgropava le bue'e de chi gavea magnà pesante.

Cordame, scurìe e bagoìne gera merce de Cìo Cordaro.

Se'e, basti, cavesse, finimenti li metea in mostra Salatina Curamaro.

 

Vitorio Teceti, destirando le sò crepe, de'la piassa varcava i confini

co'i vasi de fiori, vasi da note, pignati e tubi de vero par i canfini.

Da quei che vegnea da'la montagna, se podea comprare

careghe impajae, mestoi de legno, mastei da lissia e to'e de lavare.

 

I scaini del monumento gera ocupai dal Bersagliere

co'i aghi, penaroi, feri da calse, cordoni, elastici par le giaretiere.

ne'a Piassa de'le Biade, ora intitolà a Scalco Luigi

i vendea formento, granoturco, i fasoi sechi e parfin bagigi.

 

I "caragoi" condii de ajo e ojo, su 'na gran terina

i vendea el Ciosoto, co' 'na palanca te impienava la cartina.

-"Pana e Storti"- sigava el panaro, che vegnea co'la bici da lontan

la mastea sotobrasso el bussoloto dei storti a traco'a e cuciaro in man.

 

 

Carateristico gera l'ometo che vendea ba'oni gonfiai,

el gavea visin un trespolo trabalante, fato de bastoni incrosai

dove el tacava le bambole de ciroloide, le girandole e qualche ocarina

e picae par l'elastico, le ba'e de pessa piene de segatura fina.

 

Dove se vedea un sc-iapo de toseti che tirava la gola,

de sicuro gera el banco dove i fasea la Tira-Mola:

un baloco de pasta sucarina, picà a un ganso, i tirava

e i ripeteva 'sta operasion, fin che sotile la diventava

e dopo, tajà a tocheti, i putei con gusto la ciuciava.

 

In Campo de'a Marta invese, ciapava posto i baraconi

e tute la zente andava par vedare le vecie o nove atrassion.

Imancabile, squasi 'na tradision, ghe gera la Giostra de'e Caene'e,

el gusto gera a "calci in culo" far volare le pute'e.

 

La Giostra dei Cavai galopanti, slusegante de specieti

gera la preferia dai genitori par i sò puteleti;

sul'Altalena co'e Barchete, montava solo i zovani muscolosi

parchè par smoverla, bisognava fare sforsi poderosi.

 

Nel Globo de'a Morte, 'na motociuclista assai esperta

se esibiva in spericolati carosei, da far stare a boca verta.

El Casteo Incantato, tuto  scuro e pien de trabocheti,

gera preferio da'e copiete che aprofitava par darse i baseti.

 

Chi infiava 'na sc-iona sul co'lo de 'na botiglia

in premio vinsea un pupaseto o 'na spumiglia,

chi riusciva a butar 'na baeta nel vaseto

andava a casa col pesce rosso, dentro un sacheto.

 

Ma el Circo gera l'atrassion pi be'a e pi completa

se alternava: una anno i Caveagna e quealtro i Piveta;

par ciamar zente i girava par le strade in gran parata

co' l'elefante i pajassi i vari artisti e la banda sarava la sfilata.

 

Se de'la vecia Fiera ve contasse tuto queo che ghe gera

massa longa e noiosa deventeria 'sta tiritera,

anca se adesso tanto xe cambià, Citadea spera

che al quarto Luni de Otobre vegnì tuti in Fiera.

 

Cittadella, ottobre 1995      C H I C O

 

 

I ZOGHI DE 'NA VOLTA

 

Ormai semo in piena era atomica

squasi tuto funsiona co' l'eletronica

anca i putei no' i ze boni de zogare

se no' i ga complicati agegi da manovrare.

 

Eco parchè me xe vegnuo in mente de racontare

quanti zoghi i tosi de 'na volta, xe sta boni de inventare

da'la fantasia i se lassava trasportare

e così con poco i se podea contentare.

 

EL CAMPANON

Con un tòco de gesso o de quareo, se segnava par tera

sìe quadroni a paro, con insima 'na semisfera

su quei, a pìe sòto, bisognava saltare

e tor sù la sgera sensa mai sbagliare.

 

SALTARE LA CORDA

Squasi sempre la corda che vegnea usà par saltare

gera un tòco da quea che i destirava la lìsia a sugare,

se la gera curtina,uno solo la pode'a usare,

ma co' 'na longa, uno saltava e dò devea menare.

 

EL SIROTOLO

Un cono de legno, co' 'na broca de socolo in ponta

'na bacheta co' un tòco de spago,picà, la scuria gera pronta

a furia de scuriae el sirotolo bisognava far girare,

la bravura gera, par tanto tempo farlo rodolare.

 

VIVI E MORTI

Tòchi de quareo, messi in pìe, se allineava

co' 'na sgera, par rabaltarli, se ghe tirava,

vegnea considerà morto, el paron del quareo rabaltà;

vinsea el zogo, parchè ancora vivo, queo che in pìe gera restà.

 

BUSETA CO'E BAETE

Girando col taco de la scarpa par tera, se fasea 'na buseta

e par zugare ogni uno ghe metea dentro 'na baeta,

da 'na serta distansa, co' n'altra sfera se tirava

vinsea tuto el contenuto queo che la buseta centrava.

 

EL MAO

Se metea le baete sul culo de un bussoloto roversà

e se tirava i sassi fin che no'l vegnea rabaltà

gera tue le baete che cascava vissìn al to' sasso,

podersele intascar, come un tesoro, gera un gran spasso.

 

EL SERCIO

Sercio de legno, sercio de 'na botte, sercion de bicicleta

tuti andava ben par farli còrrare, urtandoi co' 'na bacheta

par strade e stradee se girava tranqui'amente

parchè el trafico che ghe xe adesso, gera inesistente.

 

BIANCHE-MIE

Da un manego de scoa se tajava un baston longo mezo metro

su un altro più curto se ghe fasea la ponta davanti e dietro

se pur misera gera l'atressatura, el zogo tanto te impegnava

uno tirava l'altro ciapava, uno contava l'altro misurava.

 

LE FIGURINE

I zogadori de calcio, i coridori de bici e tuti i animai gera efigiai

parfin la guera in A.O. gera illustrà, el Negus, Adua, Macalè, el Tigrai.

Co' dò o tre figurine a testa, se fasea un maseto e se lo tirava in alto,

que'e che cascava drite gera de uno, que'e roverse gera de st'altro.

 

LA SCONDAROLA

Sto zogo se fasea all'aperto, ne'le seare de majo dopo el fioreto

o ne'e case, dove ne'le stanse se imbusavamoin qualche angoleto;

queo che ghe tocava a star soto, fin al vinti el contava

e dopo l'andava in serca dei altri fin che li scovava.

 

EL GIROTONDO

Conossuo in tuta la tera, 'sto zogo xe l'emblema de l'amicisia;

se gira intorno tegnendose par man, con fraterna letizia.

Me auguro che tuti i popoli tegnendose par man in un pacifico girotondo

i capissa che volendose ben, regnerà la pace in tuto el mondo.

 

Dicembre, '95                                    Chico      (Federico Bareggi)