Bruscar le vigne

Bruscar le vigne

 

La brina, el fredo i zê soci

E amici dei nostri vignai

El vento el fa nina nana

La brina la slusa sui cai.

Ma eco che vien primavera

Amorosa, la par una mama

Par sveiar la so creatura

La ghe mete na setimana.

Su tusi, su tose ch’el sol

Romai el scumissia a scaldar

Ghe vol che bruschemo le vigne

Se nó le se mete a butar.

Badé, che l’è meio cai curti

Cussì el vignal el tra fora

Con forsa la ua par soto

E foie ben morbie par sora.

Le vigne bruscá e ligá

Le piande come un banbin

Ma lá par febraio le bala

In bote piene de vin.

Compagni a le vigne noantri

No femo vin bon sensa poda

Gesù lo ga dito sti ani

E lu no l’è fora de moda!

 

LE FASSE

LE FASSE

 

 

El tempo el gà tanta fame

El rosega su co i so denti

La storia, i ricordi pi bei

Persone, parfin monumenti

Ma prima ch’el vento smorse

Le peche del tempo passà

Vegnì che ghe mostro le fasse

Che nantri sem sta infassà

Ó fasse se mi fosse artista

Che bel monumento faria;

Na mama infassando un bambin

In chiesa mi lo metaria

Maria, secondo el Vangelo

La via distante a Betlém

La gà infassà Gesù Cristo

Parchè ghe volea tanto ben

Le fasse le gera tramae

Col fil color bianco d’amor

Con basi la mama stirea

E tuto nassea del so cor.

 

Cornelio D´Alba

BRASILE

 

pcdallalba@yahoo.com.br