Scrivar poesie

 

A prima risposta ze

“GNENTE”,

ma so stà de recente invità

a Cartiàn par la presentassion

de na publicassion poetica.

E là, ente sta tera dura de campagna,

gò scoltà paroe de gran finessa,

e proprio dove che no gavarìa pensà,

me ze rivada na risposta

che me gà incontentà.

 

Che mi scriva,

per chealtri no gà inportansa,

ma par mi el ze un momento

come d'altronde lezar de chealtri,

de estetico godimento.

 

Quel che ze certo

ze che co sta storia

no se mette su pignatta,

par quea ghe vol 'e transassion,

che po’ sarìa i schei.

 

Eora i poeti,

in magioransa,

i ga da lavorar par impenir ’a pansa,

e scrivar co ghe resta scartossi de tempo.

 

Come me pupà

quando che’l trovava e sigurissie

sparse ’rento e scarsèe.




https://www.facebook.com/pages/Cooperativa-Solidariet%C3%A0-onlus-Treviso/392692020860395?ref=hl