PROA TI MòNDARE ‘L TORO

 

 

 

  Da chée racoante machine che jera rivàe in piassa Sandordi a on boto de note, seitava vegner fora coscriti e no se capìa come ch’ii ghesse fato starghe in cussì tantí. I jera ndai fa­re ‘a zhena de‘a classe el primo sabo dopo ’a visita e, sicome che, a chel’età eà, na zhena ze na sfida al destin, pa’èssare pas­sui fa ochi e inbriaghi no ocorea che, vegnendo casa, dopo i se ghesse fermà so tute le ostarie a bere: de coà on metro e medo de onbre e de’à on metro de graspete, mesuràe col metro da muraro.

 

   Pi inbriago de tuti jera Gíno che, pa’tegnerse saldo, l’èndà suìto ínbrazharse so uno de chii albareti sganghíi che ghe jera davanti a’a canonica e 1à, tra na rasìa e chealtra, el ga tacà: -Amorre mio, no te lassío pì...Vegno ín leto co ti! - E pi che chealtri torno ridea e pi lu porchedava.

 

   Gino, che desso no’l bee gnanca pì, lora el jera na fassina de nervi da uno e setanta pa’zhincoanta chii mojo. Na bestia de toso, ístancàbíe da laoro, dal luni al sabo su i canpi, generoso e bon fa’l pan, ma al sabo de sera, pa rapenarse da’e fadighe, el se sentrìa  in obligo de moeare ‘e rèdane in volta pa’e ostarie e dopo no te' o tegníì pi, come in sta ocasion.

 

    De colpo, sora sto casin, se ga spaeancà on belcon de’a canoníca e’l pà­raco, rosso e rabuscà ‘a fuina, el ga tacà osare in talian: -Vai a ca­sa e vergognatì, demonio dell' inferno!- E altre paroeàsse.

 

Gino pa’ on atimo l’èrestà sbasìo, ma,suìto dopo, scorlando l'albareto come se’l ghesse in man on fìo descoerto de’a corente, el ga tacà zhigare: -Va ti casa tua che no te si gnanca da Sandordi!- e, tartajando ‘e pedo besteme de‘1'universo, el ghe ga rifato al prete anca l’àlbaro genealogico, mia massa nòbie!

 

    El pàraco, che’l jera on bon omo e che lo conossìa puìto, visto che là basso parlava sòeo che’l vin, el ga sarà ‘l belcon parché ‘1 garà pensà che jera mejo no conprométarse. Ma Gino seitava e lora chii puchí de’a conpagnìa, che capìa ncora calcos­sa, i ga dito de menarlo casa prima che a coalchedun de’a piassa ghe ve­gnesse voja de tirare fora ‘a s-ciopa.

 

   -Sii! Vegno casa! Mano parché ‘o ga dito eù. Vegno sòeo parché go 'a    vaca da mòndare e anca ‘l vedèo da latare!                        

 

    Toni e Cesco, ch’íi se ghea tolto ‘a briga de ndarghe drío, cu’ì ga sentìo sto discorso, saendo che, co’l parlava de laoro, el deventava coasi savio, i ga tacà domandarghe vita, morte e miràcui de sta vaca. E lu: -Na càncara ‘a ze, primaròea mora, ncora coiostrà ché ze tre dì che a’ ga fato. Diícata da mòndare come ’e tete de’a rejína, e no posso gnanca moeàrghe soto ‘l ve­dèo parché ‘l mòrsega, sto maledeto. ’A prima volta che ghe’o go moeà soto,’a ghe ga inarcà na scalzhonà che, se’a’o ciapa,’a’o copa, sta schifosa! Ricordève che i pedo castighi de dio i ze ’na peà da na vaca e on morsegon de na lùja!                                                                                                                                                                 Intanto, co ste rajonaùre, ì jèra rivài casa sua, na casermona drío strada, col passo a’a mortura, che ronpìa na sieseta de busso davanti a na portona de àrase, tuta svente, sora tre scaini de marmo: -Ciò, Toni, tome su ’a ciave in medo ‘a passàja, tacà ‘1 primo scain.

 

   -Cossa vuto che cate pa scuro in medo eà! Tòtea ti se te vùi ndar drento!

 

 

 

 

 

 

 

 

 

 

 

   Supiando come on mando, Gino el se ga trato ìn tera, el ga tacà ruspare in medo ‘l terusso del busso, ma se vedéa che’l jera uso a chea ginastica parché coasi suìto se ga sentìo el tin-tin de‘a ciave sol jarin. Co sta cíavona in man, grossa come on ­caenasso, l’è corso in medo’a strada e col brasso dríto, in posa come on schermidore, el ga tacà: -Come faròì mi a inpi­rare sta ciave granda coà inte chel buso pícoeo là?

 

    Dopo verlo dito do, tre volte, de colpo l’è partío a1 gaeòpo e Toni no ga gnanca finìo pensare: - Desso ’l se scaèssa su pa ‘a porta!- che se ga sentìo on trac-trac: el ghea intivà ‘l buso e anca verto.                                                                                   

 

Miràcoeo, miràcoeo!- el ga tacà a tuta boca, ma susurando pa no svejar so pare e, senzha saeudare nissun, l’è ndato… al si­curo: ga pensà chealtri du, anca se se ga sentìo on poco de ra­baltamento su pa’a portiera de véro.

 

    Come al sòito, la matina dopo, ora de messa ultima, i se ga ca­tà tuti in ostaria, insonai e stravanìi, ma Gino no’l ghe jera. Dopo’n toco l'è rivà, pi descunìo del sòito, e, senzha saeuda­re, el se ga sentà tacà Toni, Cesco e chealtri.

 

     Toni ghe fa: -Te sì tristo! Gheto visto ’a pòja?

 

     -'A pòja si! A podarìa èssare morto…stanote!

 

     -Ma gnanca parlare! ‘A sarà ‘a milionesima bàea che te fè!

 

     -Assa che te conte ah! Pena rivà drento, me go ricorda de’a va­ca e so ndà mòndare. Co’ so rivà in stàea, go spaeancà tuto ché ghea on caldo da s-ciopare. Ma ‘a confusion ga tacà co ghe so rivà dadrìo 'a vaca parché, rente éa, ghe ze lígà on toro da on ano gajardo, moro anca lù. Me paréa che i se scanbiasse de posto: toro a sinistra, vaca a destra, toro a destra, vaca. a sinistra. Go piegà ‘a testa da na parte… istesso! -Coéa ze ‘a vaca!- E so partìo deciso co secia e scagnèo. Me go sentà e go tacà invenarghe ‘a late. -Sinti che scarpo duro che te ghe stasera! Cossa gheto che no te vui darme dò ‘a late! Sinti che scarpo pìcoeo! Indo zee’e tete?... BAMM…Me go svejà in tera soto ‘1 pòrtego, tacà ‘1 cucio del can che me lecava '1 muso.

 

   Cuìi che jera sentai torno i ga tacà rìdare fa sassini. Toni, fasendo sforzhi desperai   pa’ resìstare naltra s-cianta:

 

-Se‘a ghea ncora ‘l scarpo infiudenà co’ te ghe ghè invenà ’a late, jera       logico noh!                                                                                                         -Coàeo scarpo, insemenìo! ’E baeòte del toro ‘e jera!

 

    Co’ tuti ga finìo sugarse ‘e lagrime el ga seità: -So vegnesto su e me go tastà: racoante pache, mae dapartuto ma roto gnente El sentare del   scagneo sbregà in du tochi. 'A sécia iscartozhà! Go mandà ramengo toro, vaca, vedèo e anca me pare, e so partìo pa ndare in leto, ma, passando paa càneva, me go beésto naltre do onbre de bianco parché al specio me ghea visto on poco tristo!

 

    - E lora te làgnito! A te ze ndà anca massa ben.

 

    - Ah si? Lora proa ti mòndare ‘l toro!