Nanetto se la gode a caval del Baio

Nanetto Pipetta

Sergio Angelo Grando – Porto Alegre – RS

A la doménega, nissun laorava a casa de Àngelo. Solo darghe magnar a le bèstie e altro no zera fato.

A la matina, là par le diese, su te la ceseta de Santantoni, le fameie se reonia par dir su el rosàrio e, dopo mesodì, i più veci ndava tea bodega zugar le carte, le boce e contàrsela. I più giùveni, o indava a morose, o chi no gavea la morosa, i dugava el futibol, o sinò i ndava in volta pal mato catar fruti, pescar e anca cassar.

Nanetto infornia el Baio e ndava a spasso. La prima doménega ze ndà catar la Gelina, che, co lo ga visto cossita ben vestio co la fatiota de casemira fata par Pino e montà te on caval gordo e ben infornio, la ze stata cossita contenta, che la à saltà zo del podol e la ghe ga coresto incontro piena de demirassion e amor.
– Ma te me par on prìncipe, la ghe diseva. No te go mai visto cossita co tanta pròsia! Onde gheto catà fora che’l bel caval e cossita ben infornio? E questa fatiota, ben fata e nova?!…

Nanetto, co àrie de poco caso, de quele robe che la Gelina catava importante, par lu zera cose comun, naturale, sensa tanta importansa, ghe diseva:
– Ze gnente cossita pròpio importante. Basta laorar polito e ndar in règola che le cose bone scomìssia capitar. Se la va cossita, in puchi ani me compro anca on tocheto de tera e dopo se maridemo.

La Gelina volea dirghe che no la vedea l’ora, ma, la ga considerà che zera meio no dir gnente, parché zera del omo l’incàrico de propónere quei assunti.

Nantra doménega, ze ndà catar Gìgio Frison, par ringrassiarlo nantra volta tuto quelo che’l ga fato, quando el gaveva le sigale che sburnava tele rece e dopo ze ndate via cole pìrole del Dotor Ivo.

Cossita el tempo passava e el cavalin, cada volta più tondo e pien de morbin. Zera drio spirar i due misi del trato fato col zio Toni. Zera ora de darghe indrio el Baio.

On giorno, el monta in pelo, co na cavesseta de corda de mato, par mostrar al zio Toni che’l caval zera pròpio manso, Nanatto se presenta tel cortivo osando:
– Ò de casa, ze rivà Napoleon montà in pelo nel caval Baio.

Co’l zio Toni lo ga visto in pelo e co na cavesseta de corda de mato, el se à messo rider:
– Te ghè pròpio compio quel che te è promesso. Speta lì, che monto su anca mi par veder se l’à forsa de portarme.

El zio Toni el pesava rente cento chili, ma el Baio se à stradà a passo verto sensa gnanca na fadiga.
– Adesso, dise el zio Toni, son mi che te fasso na proposission. Lo doperemo insieme. Un negòssio cossita: mi meto el caval e ti te ghedè da magnar e te lo inferi. Cossa te pàrelo?
– Parlé anca massa polito, Signor Toni. Negòssio fato.

Nanetto pensava:
– Che cucagna! Sensa tirar fora on fiorin, ò redità on bel cavalin.

Par quelaltra banda, el zio Toni pensava:
– Doparo el Baio co’l me ocore, e no ò pensiero de darghe de magnar e inferar. Cossita ndemo ben tuti.

Sergio Angelo Grando
Email: sergio.grando@terra.com.br