Cari amissimondoveneto tuti:

 

Staolta go na grande notissia da darve,

e le foto che vedarì tacàe a sta lètara

ze ‘a dimostrassiòn de’a nostra serietà,

de’a nostra voeontà de fare e robe par ben.

 

Come che tante olte gavì leto so e nostre... cariche leterone...

serchemo sòeo de conòssarse tra niantri: emigranti e dissendenti

par farse sentire pì vissini tra niantri

col core e’l mondo in man.

 

Calcuno de chi che ne lede,

de sicuro i ne ga messo so a casèa de posta... da butare... e no i ne ‘o dize;

altri i ne lede ma i a pensa diversamente, e gnanca i ne ‘o dise;

altri, veramente no i ga gnanca ‘l tempo par dirne un CIAO ogni tanto,

altri’ncora che ne lede no i ga voja de mandarne na riga

par paura de chissà che impegni che ghe speta.

Calcuno ormai ga na età che no ghe interessa pì, forse.

 

Ma quando che ve scrivo,

assando stare ogni sorta de publicità,

evitando de tocare a poìtica par rispetare ‘l pensiero de ognun,

quando che ve scrivo, amissimondoveneto del mondo intiero

ze par tèndarve na man!

No parchè mi possa rissòlvare i problemi de tuti,

no parchè mi possa aiutarve in calcossa che gavì de bisogno,

no par vere incambio na man piena a una voda che posso tèndare,

ma par dirve che semo in tanti, veramente tanti veneti in giro pal mondo

e a me man tesa, e man tese dei amissi che de volta in volta trovè so’e nostre lètare,

par dirve che semo in tanti che podemo tèndare ‘na man

e tuti insieme ciaparse “virtualmente”

e fare un giro-giro-tondo in torno’l mondo!!!

Scambiarse pensieri, storie, raconti, poesie.

Parlare a lingua dei nostri bisnoni,

racontarse dee nostre vicende, e magari, come sta’olta:

trovarse anca de persona se capitasse l’ocasiòn!!!

 

Staolta, par esempio, na nostra amiga de Veranòpolis:Declei Padova Peixoto

ne ga dito de so fiòea che studia a Padova

e suito se ghemo messo in moto i amissimondoveneto che stemo vissìn

e ‘a ghemo invità. Invità a casa nostra!

Co tuta a modestia e semplicità de una famejia normàe.

Cussì ze sta che Cindy Eliza Peixoto studente a Padova:

ze sta a prima persona a trovarse de persona coi amissi “virtuai” de Padova!!!

 

La so visita in calche modo ghemo sercà de fare che rapresentasse tuti!

No sòeo i amissi del Brasìe, o del Sud America o del NordAmerica,...

ma de tuti i amissi veneti del mondo

in modo particoeàre ai destinatari dee nostre lètare!

 

Cindy, col so masso de fiuri coi nastri del coeòre del Barsìe col fioco dea bandiera italiana,...:

VE GA RAPRESENTA’ TUTI!!!

Come se tuti fossi stati qua a casa nostra

sentài in torno a nostra tòea

Anca tuti chi che ‘ncora no ne ga mai scrito! TUTI I AMISSIMONDOVENETO... DEL MONDO

 

Co gavì ocasiòn, do minuti de tempo, un s-ciantiso de voja de sentire chi che semo, cossa che femo...fè un click sol “Rispondi”... e mandè un ciao...

ze come verse dato un strucon de man,

come verse dato un baso,

come èssare stati qua co niantri Mèrcore 11 marso 2009!!!

 

Cari amissimondoveneto...: un strucon col core e’l mondo in man!!!

 

Roberto Zaniolo