A'e oto de na matina de fine novenbre, crua de brosa ùmida co 'l soe nassente drio veade de caìvo, Toni spetava 'a coriera par Padoa pestonando insonà e col fredo che ghe passava parfin pa'l còeo de'a camisa. Vardando verso 'a curva da indove che 'a ghea da rivare, el ga visto 'l Mosca vegner fora da 1'ostarìa e inviarse verso 'a fermata, verto de còeo e co' a jacheta desbotonà, come senpre. 'A mosca so 'a sbèssoea che 'l se ghea portà casa anca da 'a presonia, el se 'a ghea tajà dopo tri ani de paròe de'a femena, ma par tuti el jera restà el Mosca e basta. Co’l ghe ze rivà rente e i ga tacà discòrare, Toni ga indovinà suìto cossa che 'l ghea magnà a marenda: saeàdo co l' ajo, scaeogne in aséo, vin e cafè co' a graspa, e ghe vegnèa da rìdare pensando a coando che so sàntoeo contava che al Mosca, òpara da luri, cu'i 'ndava segare no se podéa starghe so l' anton davanti parché te ghii senpre 'a so falzha che sgrentava a vinti schei da'i garètui e lu che osava: -Davai!- Jera pedo se te ghe stai paradrìo parché ogni tanto viajava par aria de chee vitamine da mandare in svanimento on bo. E luri voèa inpienarghe 'l coàro de cleorina. Intanto ze rivà 'a coriera e Toni, che 'l voèa fare 'l sòito soneto fin Padoa, lo ga assà montare pa primo, sperando de no 'verlo rente. Ma co'l se ga sentìo ciamare dal Mosca che ghe tegnéa 'l posto, pa creanzha ghe ga tocà rassegnarse. Deciso però a proar dormire, el se ga inbautà-sù col paetò, lagnandose pa'l fredo.
-Fredo coesto? Cossa garìssito fato ti in Siberia!
Toni 'o ghea sentìo ncora, da bocia, contare fati de goera e de Siberia, ma i ghe jera restài in mente a frègoe sparpagnàe e senzha tenpo, come da naltro mondo. A sentire ncora sto nome el se ga svejà fora suìto come da pìcoeo co' l scoltava i grandi a fiò e, fasendo finta de no ricordarse:
-Parché sio sta anca in Siberia?
-Presoniero in Siberia, in Russia, in Germania, in Ungaria e indove che i me menava. Go fato pi goera da presoniero che da soldà. So rivà de leva in Albania cu'i ultimi conplementi de'a Julia, che jera coasi finìo. Go traversà meda Russia a pie col mùeo che in otobre del ‘42, descargando i basti, el me ga dà na peà so'a schina: tre coste rote, pleurite, ospedàe a Karko e viàjo da inferno in treno pa'l' Italia, pien de freve e de mae e de peoci. L'ano dopo, co’ go parlà co i reduci de' a ritirata, che i me disèa inboscato, go capìo che fin lora 'a me jera ndata anca massa ben. Ma 'a fortuna ze finìa l'8 setenbre cu' i tedischi me ga ciapà a Tarvisio. In canpo de concentramento i voèa che ndàssimo conbàtare co luri. Pa on tòco go resistìo, ma l'inverno jera longo, co fame, fredo, jente che murìa e mi senpre pi stròfico. -Mi al fresco- pensava -e 'l re scanpadore co i so caporiùni al caldo, e passùi. Cuìi te fa giurare senpre pa mandarte crepare, mai pa invidarte magnare!- E cussì so ndà arbàite (lavorare) pa 'i tedischi. In primavera i me ga mandà co altri taliani torno Budapes a fare i forti. 'A jera senpre na vita da presonieri, ma se sentìa dire che i russi vegnéa vanti. Co’ se ga tacà sentire 'l rudàre del fronte, i me ga miitarizà e parà in prima linea disendo che, se no ghe tiràimo ai russi, luri me tirava a noaltri. Insoma pedo 'l tacon del sbrego! E i ze rivài
sti russi co granate e cari armati ai primi de novenbre. Ti seto cossa che ze on MG? Ah, te ghe ncora da fare 'l miitare!- Là 'l ga tacà smissiare 'e man pa farghe vèdare a Toni come che ze fato e come che se arma l'MG. Po'l ga inbrancà 'e sponde del podatesta davanti, come che 'e fusse 'e rece de 'a mitràlia, e 'l ga tirà na ràfica longa: -Ra-ta-ta-ta-ta- 'A testa peà de coèo sentà davanti 'a scorlava drio 'e scosse de'a spaliera, ma no 'l ga dito ’na paròea. Intanto 'l Mosca co 'a so ose forte, senpre pi forte: -I cari vegnéa vanti co 'a fantaria paradrìo e mi sparava, sparava. -Foia! Foia! - (Feuer = fuoco!) sbaiava on sergente tedesco e mi in diaeto zhigava: -Gheto i cavalijri che magna de furia, desgrazhià!- Pa racoanti dì ghe ze stà 'l finimondo. Rivava de chee granate che levava toneate de tera. Tre, coatro volte so vegnesto fora da sototera, ruspando come na tupinàra, e ze stà 'lora che ghe go fato 'l voto a Santantòni. A'a fine i russi me ga ciapà tuti chi i puchi che jèrimo restài, insemenìi e ferii, e ga tacà naltro calvario. Vanti a pie senzha magnare, davài e scùria e a chi che cadìa na s-ciopetà e via, E dopo in treno, su'i cari bestiame, on poco de pesse saeà e racoante sbaiàe de neve cu'i se fermava descargare i morti. E po' no vùi pi parlàrghine ché ze mèjo! Semo rivài pi morti che vivi, in pien inverno co neve dapartuto, so naltro canpo de concentramento in medo na foresta: de'a Siberia -go saèsto dopo-. Là i me ga disinfestà e dopo on viliaco de talian, vestìo da russo, el ga tacà dirme porci fasisti, colaboratori del nemico. E 'lora a spiegàrghe che jèrimo prisonieri da l'8 setenbre, che jèrimo in prima linea pa scavare fossi anticaro e che, pa capirlo, bastava vardarme 'e man tute cai. Me gài credesto o no, dopo i ga voèsto savere 'a nostra arte da civìi. Mi ghe go dito: -El cogo-, pa' a fame, 'a desperazhiòn e anca parché me rangiava in cusina; ma no garìa mai pensà che 'i me fesse anca proàre e de catàrme cogo del comandante. Dito ch'ii magnasse poco ben prima, se uno fà mi 'l ghe parèa rivà da Pariji. Ressurèsse! (resurrexi = sono risorto). Al caldo, co calcossa de bon anca par mi e i me amizhi pi stòfici che gnen ncora desso ringrazhiarme de verli jutài portar casa 'a pee. Pensava che 'a fortuna fusse tornà e invezhe 'l demònio ghe ga messo 'a coa. Ghe jera 'l gato del comandante, grando e grosso come che no ghin'ò mai visto, che'l vegnèa senpre in cusina. Mi 'o tendìa che no 'l me ciavasse 'a carne e anca ghe garìa fato 'a foja tanto voentiera. Na matina de'l istà del ‘45, fin che meto-su 'a pignata pa farghe 'l lesso al capo, sento miao, miao e no fazho gnanca ora girarme che ze sparìo el gato e'1 bel tòco de carne che ghea da cusinare. El comandante, có so ndà dìrgheo, no 'l ga voesto crèdare che 'l so gaton me ghesse ciavà 'a carne. El ga dito che jera stato mi e 'l me ga fato dare diese scuriàe co 'a nagàika. Ciaparle senzha colpa, e pa on gato po’, 'a ze bruta, specie se 'a schina te inzhènde. -Te vedarè che se te me gnin soto 'e zhate, a te ‘a dao mi 'a biava, fiol-de-na-tròia! I cunti ga da tornare co 'a carne! Difati l'è rivà lu in cusina el dì dopo e, co so restà mi sòeo, inte on àme el jera za peà, spartìo e sparìo; e par na volta i amizhi ga canbià menù. Credèa farla franca ma, o i me ga fato 'a spia, o 'l capo ga magnà 'a foja, fato sta che go ciapà naltre diese scuriàe, basta in cusina e via int'ii buschi a tajar-basso albari. Passare dal beo al bruto 'a ze dura! Prima anca coalche tocheto de carne, dopo sboba schifosa, uvi de osèi
e altre porcarìe pa restare in pie. Saìimo che 'a goera jera finìa e che i ghea da moeàrme, ma intanto jera rivà naltro inverno. On dì che nevegava e che jèrimo so 'n posto novo a tajar-basso albari senzha goardie, tanto chi vuto che scanpàsse, 'ndando tore on carèo-slita go visto na isba distante, in medo na s-ciaraùra de àrasi. Tanta jera 'a fame che so partìo suìto ndar védare s'ii me dava calcossa da magnare. Có ghe so rivà rente, ciamo: nessuno torno casa. Toco 'a porta: no' a ze inciavà e mi va drento, no vedo jente; lora ruspo in giro e cato coasi suìto on sachetèo de farina. Fazho pa inpiràrmeo so'l sen e me sento brincare pa 'l copìn e sgiaentare in tera indrìo-schina. Cadindo vedo uno, grosso e peoso come on orso, che l'è drio caeàrme 'l manarin so'a testa. D' istinto alzho 'l brazho, 'a vìdito sta secatrice coà? L' atrezho me sbrega mànega e pee e 'l ghe salta via da'a man. Come on gato me buto sol manarin, salto in pie, ghe'o inpianto in medo 'a testa, verdéndoghea in do mede, co’n s-cioco, come na anguria, e via-fora, spaentà-morto, ma col sacheto in man. Eh sì, caro mio, 'a goera te fa deventare bo, mùeo, leon e iena!
Dopo on mese de viàjo, in marzho semo rivài Verona de note e in stazhion no ghe jera nessuna. Mi me go butà dormire in tera soto 'a tetòia. A'a matina me sento scorlare, verdo i oci e me vedo circondà da fémene e vecioti co in man fotografie de tusi in divisa, e tuti insieme vol saère se go visto 'l suo. Mi ghe go dito de no a tuti e so scanpà. Come podéa spiegarghe a on pare o a na mare che, indove che so stato mi, no ghe jera chii musiti lustri là, ma desperài, stròfici e cristi in crose? L'inverno de l'ano dopo, propio na matina, sielta, de vento e neve, come che ghe ghea promesso a Santantòni a Budapes, se portava casa 'a ghirba, so partìo pa scuro 'ndar Padoa a pie. Vestìo da alpin, ben carburà e col zàino pien de pàja, in medo chea neveta borghese là a ndava fa on treno. Co’ so stà so'e longhe de Limena, me ze passà davanti e po se ga fermà suìto na machina, ze desmontà on sior che 'l me ga domandà se voèa montare. Mi ghe go risposto che no podèa, spiegàndoghe del voto e de tuto 'l resto. Lora 'l me ga contà che 'l ghea on fiòeo disperso in Russia e 'a ze ndà finire che se ghemo messi criare tuti-du. Prima de partire 'l me ga convinto a ciapare on puchi de schei. Ma se no 'o catava jera mèjo parché, dopo, 'i canpi coèrti de neve ze deventài Siberia e i canari drio 'e piantàe jera i desperai del davai, come mi 'lora e desso. Cussì co’ go catà 'a prima ostaria al Tichiero, fin che no 'i go beìsti tuti, no so partìo ndar casa inbriago. Ma 'e ze robe che no te-te desmènteghi pì. Seto coante note che me insògno de coèo che go passà e me cato in senton so'l leto che zhigo, tuto suà? 'Lora 'a fémena se sveja: -Bùtate e dormi, insemenìo!– Ea, parché no 'a ga visto gnente, sta inboscata!
In coriera se sentìa sòeo el rudàre del motore.
On luni de matina de metà agosto, a'e diese, jèrimo 'ncora drio far sù pan: i sòiti du furni in pì pa'l dì de marcà, e pa 'e vetrine de'a botega se vedéa 'l gran via-vai de jente in ferie in volta pa'i banchi de Zhitadea. Berto e Piero jera ai furni, Bepi fora co'l giro de’ consegne e mi de corsa tra formatrice e trància. Tuti taséa, stufi e indafarài, se sentìa sòeo 'l sòito trafegare de on forno da pan e ‘l rudare de’a impastatrice e del ciìndro senpre soto parché, co coatro fornari, coéo de Bressa jera’l forno pì grando che ghe fusse mai stato a Zhitadea.
De colpo, pa'a porta de servissio tacà 'l forno de Berto, se ga presentà drento na sposa dòvane, mai vista prima, mora e ben fata, vestìa lejera, co' in brasso na putea de on par de ani:
- Ciao Berto, te go catà finalmente! Gh'in à voesto pa' saère indo'che te lavorài, sassin che no te si altro!
No ze che 'a parlasse rabià e lu 'a vardava inocà co'a steca piena in man, meda drento e meda fora da'a boca del forno. Co’l'è vegnesto in sì, el me ga fato de moto: -Finissi ti infornare!- e, fin che ea roversava fora na brentana de ciàcoe, la ga coasi urtà drento 'l spoliatoio e là i se ga messo parlare pianeto. Co’ go finìo infornare, anca se no voèa disturbarli, me ga tocà ndar de'à istesso pa vèrdare 'a vàlgoea e, rivà so'a porta, prima go sentìo 'a spussa e dopo i go visti davanti 'l lavèo: lu che tegnèa 'a toseta co’l cùeo soto 'l rubineto, inbrancà come na anguria co te ghe fè 'l tassèo, e so mare che finìa de lavarla. In sti casi ghe ocore senpre on pìssego de creatività e cussì go despicà da'a caiciàra l'ùnico sugaman de Berto e ghe'o go dato a'a sposa disendo: -Che brao paparino!- Ea me ga dito: -Grassie!- Lu 'l garìa pagà no-so-cossa pa poder slongare 'l còeo e morsegarme. Da chealtra parte del laboratorio Piero, tuto rosso, el se sugava 'e làgrime. Da eà on toco i go sentii saeudàrse, ma Berto jera pena tornà al so posto che ea da'a porta, tegnendo 'a pìcoea in vanti come on trofèo, 'a ghe ga osà:
-Gheto visto che bea putèa che go fato, ti che no te ghe gnanca voesto maridarme?- E 'a ze ndà via.
Berto ga tacà sacramentare pianeto e dire cossa che'a voèa da lu. Lora go pensà che 'a fusse na so vecia fiama parché 'l jera on bel toso, on atore insoma; ma pa' ridare e no sentire 'a fadiga bisognava cagnarlo istesso. So coéa 'l me fa:
- Dopo te me darè 'l to sugaman, noh?
- Te ghe voja! Te fa schifo 'l to sangoe par caso, vergognoso!
- Coàeo sangoe mio, can dal porco ..., 'a ze na me morosa vecia za sposà da un toco!
Riva Piero: -Oh mamo! Sarìssea 'a famosa Esterina?
E mi: -Fineta propio! On bijou! Ndo 'a gheto ruspà fora!
-Piero sa 'a storia. Ti, anca se te si novo, te 'o se che 'l me sogno ze de vere on forno par conto mio.
- Par coèo te me ghe anca dito che, fin vinti ani e passa, a tenpo perso te ghe laorà, e a tenpo pien te ghe corso in bicicreta e corso drio a tute 'e còtoe.
- Lora si che ghe'a trea a muinèo! Però na sera, Bassan, el dì prima de'a Bassano-Montegrappa, in albergo go catà Bàrtai e ghe go dito: Gino, no te me catarissi mia on posto inte na scoadra de professionisti? Seto cossa che'l me ga risposto?: -Canbia mestiero!- Adio trea e anca muinèo! Ùltima speransa na tosa co schei! 'A Esterina me parèa 'a pi adata parché so pare l'è on bacanoto grosso, pien de canpi e de paeanche. Se fào 'l serio, go pensà, chissà che prima o dopo no 'l me inpreste i carantani pa'l forno. E intanto ghe go regaeà on aneo che costava na sostansa. Na sera, dopo 'n bel toco, al vecio ghe go spiegà 'a facenda, zontàndoghe che jera pa 'l ben de so fiòea, e ghe go domandà sie miliuni in prèstio. Seto cossa che'l me ga dito?:
- Pitosto de dàrtii a ti, a'i pesto!
- El te ghea za pesà lu, e anca co 'a còa drento 'a bassacuna!
- Ma va eà! Cuìi ze jente che ga 'a fame di i so veci scrita inte 'l sangoe come 'a paura de'a morte. Cagnìseghi e malvisti da'a pastasuta, pa muciare. Ma se ghe ze da slapare a'a maca, tipo nosse, cu'i ghe riva tacà 'a grùpia, dopo tri dì de digiuno, astinensa e purga, i se tira da na parte anca 'l zharvèo pa insacarghine de pì anca là. E po', na sera, ch' ii ghea da 'ndare a nosse, el ga dito: -... e sabo, coèo che no magno, a'o pesto!- Insoma sto "pestare" 'a ze propio ‘a so carta d' idintità!
- A te ghe disi-sù desso! Te dispressi parché, invesse de darte i petachini, el te ga insegnà 'a madona-del troto!
- No, caro, so' stà casa mi pa no far pedo, ché ea jera inamorà morta e mi ghea finìo 'l scopo. Però prima, sicome che a'a doménega ndavo eà che 'a jera ncora in-funzhiòn e i me assava mi sòeo in cusina co'l gato, na volta so ndà in càmara sua torme 'l me anèo so'l cassetin de’l' armaro. 'A Esterina dopo ‘a credéa de verlo perso e no 'a ghea coràjo dìrmeo. Mi braàva parché no 'a se'o metéa mai, cussì ghemo coestionà e no so pi ndato. So pare ga fato na bàea da'a contentessa e mi co l' anèo me go conprà 'a bicicreta nova da corsa. Ma no se sa mai indo' che staga 'l pesse e cussì so ncora in zherca de na tosata cu'i schei parchè 'l forno par conto mio 'o go senpre coà inamente.
No'l jera bon capire se 'l se insuniava o se davero na man 'o scorlava. Inte'l barùjo de spaghi de luce che ghe baeàva drento i oci ghe paréa parfin de vere 'a lengoa paraisà e de no podèrghe rispòndare al -Dino... Dino- de coéo che ghe paréa so pare. Co l'è sta bon borbotare: -Ma ze za ora de levàì?- so pare ga seità pinpian: -No, no. Ze 'e do e meda, ma go paura che vegne-su tenpo e ti bison'che te vai tore 'a farina chè noaltri ghemo 'l fen da far-sù.-Senzha gnanca 'a forzha de protestare che’l jera in leto da on’ora, co 'e man che faséa fadiga strèndare 'a zhéntana de'e braghe che 'l se inpirava de trabucon, el pensava a coanto porca che sarìa stà ‘a note a far-su el dopio de pan pa 'l sabo: -Parché stassera vao via istesso, credesse morire!-
Fora da'a càmara, cu 'i oci medi sarài pa'a luce forte anca soto 'l portegàe, l'è ndà drito so 'a ponpa pa svejarse fora co 1'àcoa freda. Ma fin che 'l se 'a traséa so'l muso e so'l copin, no'l sentìa nè mojo nè fredo, come che'l ghesse na scorzha. Lora, senzha pensare, el ga inpiantà 'a testa soto-àcoa e coasi suìto i oci spaeancài se ga fermà vardare 'a rete slusegante di'i riflessi del soe so'l fondo de l'àlbio: -El tenporae co sto soe coà!- De colpo 'l se ga tirà sù e, co 'e jozhe che ghe coréa-dò pa 'e braghe, senzha badarghe a so sorèa, là tacà co sugaman e camisa neta, el se ga voltà verso so pare che tacava 'a cavàea: -Oh! Ndo zéo sto tenporae?- Tilio, seitando contare i caenei de on tiradore da mètare in tiro justo: -Varda 'a cavàea!– Difati 'a Mora, testa alta co ‘e rece drite, rachiete, ogni tanto 'a scorlava 'l peto come che 'a ghesse na tavarnèa -No se vede gnancora nùvoe ma 'l ceo ze in late e 'e mosche pìzhega. Te sè che i me ga dito che 'a ga paura co gnen su tenpo.- Difati el contadin che ghe 'a ghea vendùa, e che voéa darla via anca da carne, pur de deibararse dopo 'n spaurazho, el ghe ghea dito che al primo lanpo e ton, se 'a se catava fora, 'a faséa 'l disastro fin che no 'a ndava al coerto parché 'a jera stà spaentà e ferìa da na schèja in goera cu'i tedischi. Ma 'a jera beissima: tuta mora, granda e suta, còeo potente sora 'e spae. Tilio ‘l se ghea inamorà suìto: da 'i dinti 'a garà bio diese, undas'ani e po 'l prezho jera bon par lu, vedovo co poca tera e oto fjui, co Dino, 'l pi grando, da disdoto ani. Pa barca-menare la traséa in tuto: cu 'i du scaezhoti pi grandi el se ghea messo anca far pan e co chel mestiero 'e robe ndava senpre mejo. Senpre pi farina da menar casa e corbe de pan da menar via, cussì la ga tolta parché: -Pan e farine no viaja soto i tenporai!-.
Da pena partìì, Dino 'a ghea messa al troto e'l jera on bel sentire sòeo 'l bàtare di i feri desso che 'a careta ghea 'e rode de goma. Ndando pa in sù, in provinciàe, el ga butà l'òcio a sera e, distante, sora 'e siese, desso vegnéa
vanti tre gran zhate de nùvoe intorcoeàe. - El gnen-su propio dal Garda! De cuii cativi! Oto chiometri tra ndare e vegnere, dovarìa fàrghea!- Na scorladina de rèdane e 'a Mora ga slongà suito cu 'i garètui che rivava a na spana dal baestro: -Co rivo al muìn ghe slongo i tiraduri prima che 'a se faga mae - Al ponte Sauro el barùjo de nùvoe, bianche in zhima e negre soto, el jera tanto pi vanti, ma pa'l stradon de Santana, voltandose vardarlo cu'i àlbari che coréa indrio, e iludèdose, ghe paréa che 'l se ghesse fermà anca coando che ze ndà via 'l soe. Al muìn pa fortuna no ghe jera nissun ma, par coanto presto ch 'ii ghesse fato cargare i dòdase quintai de farina e coèrdare 'l carico co'n tendon, chè ‘l munaro ga dito: -Senzha de coesto no te parti, co l'è saltà so'a careta pa ndar casa romai 'l céo jera tuto on ingropamento de nuvoeùni sgrunfoeùsi e carghi che se urtava inte'l scuro tènabre. El vento de matina scorlava 'e zhimoete de'e piante pi alte e smorzava 'l rudàre continuo del ton. In fondo, sora 'a ponta del stradon che se perdìa inte 'e do zhiése, vegnea vanti in pressa 'a coltrina grisa de'a piova e 'a cavàea se ghea messo ea sòea al gran troto. De colpo, insieme, na luce da orbare e on s-cioco tramendo, a arco, che paréa che se sbregasse i travi del céo: 'A Mora ga spicà on salto in vanti rugnindo e Dino 'l se ga catà coasi indrio-schina sora 'l tendon, imagà a vardarla sbrenà al gaeòpo: testa e coa alta, che 'a brusava 'a strada e, pi che pa còrare, paréa che 'a tocasse tera pa spicare 'l zòeo co 'e ganbe che scuriava l'aria. Soto on teramoto de lanpi e tuni continui, i mùscui di'i cossuni springava soto 'l peo mojo de suòre e sbiumà torno 'a sea e soto 'a braga; i feri lustri, co 'l colpo indrio, 'i rivava pi alti del baestro. Vardàndui puito ghe ze vegnesto 'l struca-core: -Demonio can, 'a ga i ranpuni finìi! Come farèmui fare 'a curva de'a provinciàe! Coesta no se ferma gnanca se te ghe sbreghi 'a boca!– ‘A strada spaltà iera là davanti, senpre pi rente soto i platani rabufài che sbarlucava co'e saete. 'A piova jera in zhima. -Coà se copemo tuti du se 'a sbrissa in curva!- De saltar basso però gnanca ghe passava pa 'a testa e 'l zhercava de rapetarse so'a careta che saltonava sora 'e buse, vardando 'a crosara, senpre pi spaentà. Ncora puchi metri: -Desso ghe semo!- Ma 'a Mora, come che no 'a ghesse fato altro in vita sua, senzha raentare, 'a se ga butà in dolzhe a sinistra scurzhando i passi e, podàndose co 'l cùeo so 'a stanga interna, 'a ga drizhà puito 'a careta in provinciae. Dino che 'l jera restà come paraisà, co'l se ga visto salvo, soto 'e prime jozhe grosse fà bronbe, che ghe sciafedava 'l muso, in pìe so'a brazhòea el ga tacà osare fa on mato: -Moraa, te si mejo de Fangio! Vai, demonio neroo! –Ma 'l "demonio nero" romai 'l iera dapartuto: s-ciafe de àcoa, vento, rame scaezhàe, foje, rujana, saete e canonàe. No 'l vedéa pi gnente, sòeo 'a schina de'a cavàea che ndava scaenà, rangiandose catare 'a strada inte 'l fumo del diluvio viòea e verde pa 'i ultimi du chiometri che no finìa mai. Cu‘i ze rivài soto 'l portegàe, l'è stà tuto on osamento e man dapartuto che despicava, desligava e cavava. Sora tute 'a ose de so pare: -Sugarla e coèrdarla co do coerte suito!-
Dino, intordìo, el jera restà sentà so'l bragon, tremando.
=====================================================
Scrivi commento