Mariano Guzzonato   marfort50@gmail.com

 

 

 

 

 

 

Cari amissi,

                 me fa senpre un gran piassere ricévare le vostre mail, anca quele in spagnolo o portoghese ch'el sia no' lo so, son ignorante e me piase scrìvare in dialeto o lingua veneta che se diga. E a proposito de questo a ve mando la me poesia sul Natale, ca recitarò el 13 de Dissenbre a Thiene insieme ai me amissi poeti del "Graspo". 
E come ca disì valtri un abrasso e un strucon con tanti Auguri pae prossime Feste.

Mariano Guzzonato.

 

                                        

 

N A D A L E    D E   A N C O'

 

 

 

                                     

                                               No' so mia dir se te convegna 'ncora,

                                               caro Gesù Banbin,

                                               de ritornare qua sora sta tera

                                               in mèso a sto casin;

                                               te ris-ci de morir prima del tenpo,

                                               che suito te sì in crose, sensa scanpo.

 

                                               Un mondo de busìe, marso e distruto,

                                               indoe che tanti i more:

                                               chi che se copa o vien copà de bruto;

                                               e in più me more 'l core

                                               a védare che i roba zò a man bassa,

                                               dei altri i se ne frega, e po' i sganassa.

 

                                               Pensar che bastarìa 'na “bona voja”,

                                               come 'l ga dito Lu,

                                               aver la mente nostra un fià pì sveja,

                                               che anca solo in du,

                                               podemo far de mejo, solo insieme,

                                               sa se metemo uniti nel So nome.